Estamos kontinuando kon Joel A. Zack, arkitekto amerikano i realizador del lavoro “The Historic Synagogues of Turkey”. Por lo mas me aprovechi del livro /album dando anchas eksplikasyones i informasyones istorikas sovre las Sinagogas, ansi ke las fotografiyas muy presyozas de Devon Jarvis. Munchas Sinagogas desparesyeron sin deshar trasas. Syertas se topan en ruvinas o estan serka de kayer en ruvinas. İ enfin, otras komo lo savemos estan kontinuando a dar sus servisyos relijyozos a la Komunidad Djudia.
La Prof. Jane Gerber, Profesora de “Historia Djudia” esta dizyendo: “Joel A.Zack i su ekipa reusheron a realizar una importante performansa kultural. Estan deshando para la posteridad un riko testimonyo de la Erensya Arkitekturala Djudia en la Historia Otomana i la Turkiya Moderna.”
A traverso las fotografiyas i las eksplikasyones, se esta pudyendo konstatar la organizasyon de la vida komuna djudia... Una organizasyon de kaji mas de 10 siglos antes la formasyon de la Dinastiya Otomana. En este kuadro jeografiko enkontramos serka de İzmir, la mas ansyana Sinagoga, en las Ruvinas de Sardis datando del 3. Siglo de la Era Kristiyana. Aki unas, kuantas linyas del livro de Zack: “..Esta famoza Sinagoga ke se topa en Sardis serka İzmir es una de las mas ansyanas ke puedemos ver aktualmente. Esta fragua ke al presipyo no fue echa kon el eskopo de servir de Sinagoga, kon tyempo fue transformada en un lugar de orasyon para una ancha Komınidad Djudia. Oy no kedo muncho de esta Sinagoga. Portanto, ya se save ke fue una grande fragua delantre de una guerta en forma kare. Estas ruvinas adornadas de diversos lavoros de mozaika, esta debasho la proteksyon del Governo. Es un Sitio Arkeolojiko vijitado por un grande shifro de turistos.”
Aki kero avrir una paranteza... En el “Şalom” del 7 Enero 2009 aviya una chika novela en turko. Syendo ke estava avlando de una aktividad enteresante me travo la atansyon: “La Historia se arrebivyo en la Sinagoga de Sardis”... Esto era el titolo segido de una chika fotografiya i unas kuantas linyas... Me espanto ke esta informasyon paso sin ser apersivida por munchos lektores. Meldi ke oganyo, un grupo de İzmirlis, enkavesados por el Rav Yisahar İzak, asendyeron las kandelas de Hanuka en la una de las mas ansyanas Sinagogas del mundo i dela kuala, en muestros diyas kedo solo las ruvinas. En el sovredicho album / livro de Joel Zack entre munchas otras, ay un ermoza fotografiya de estas ruvinas de Sardis...
Antes de ampesar a sus viaje, estas todas fotografiyas ekspozadas en la Galeriya del Muzeo Historiko Djudio de New-York, fueron muy apresyadas. Mas despues fueron tambien prezentadas en Washington D.C, Seattle i Washington antes de arrivar a Estambol, al Palasyo de Topkapı.
Komo konkluzyon el Sr. Zack esta adjustando: “Puedemos dezir ke estas Sinagogas son una ‘evidensya’, un testimonyo de la Historia, de la identitad i orgolyo de la Populasyon Djudia aktuala de Turkiya. Si estas fraguas estan en el perikolo de ser pyedridas, esto deve sinyifikar tambien una pyedrita para la Kultura Universel tambien.”
