Antes dyes dias selebrimos la fyesta de Tu-Bishvat, ke kere dizir el 15 del mes de
Shevat. La fyesta mueva, el presipyo del anyo muevo de los arvoles. El empisijo de la primavera.
Tu-Bishvat es el empisijo del kalendaryo de la agrikultura (tarımsal takvim).
Los arvoles son emportantes para los paises. Kon la ermozura eyos dekoran la tyerra, i la protejan de la erozyon en las luvyas muy fuertes.
Este anyo se selebro en la sinagoga Hemdat İsrael de Kadiköy kon muncha alegriya.
Por selebrar esta fyesta en muestras kazas kon muestras famiyas i amigos, komimos todo modo de frutas i meldimos las Berahas.
El Dyo ke mos ayege para kada anyo…
El 14 de Febrero era el dia de los Enamorados (sevgililer günü), ke se esta fyestando en el mundo entero.
Yo penso ke; selebrar este dia, no es solamente akodrarse; ma, pueder kontinuar la vida entera esta.
Amor, esta kerensya i esta emosyon, pueder propajar (yaymak) a todos los dias, los momentos kerensyozos ke pasamos kon el denfrente.
Muestro korason es yeno de kerensyas diferentes. Kerensya de madre, de ermano, de amigo, de eskola, de vida i lo mas emportante; la kerensya de marido u mujer por la vida entera.
Ser vensido (yenik düşmek) aze a la persona modesto, la tristeza (hüzün) aze la persona, persona (insan) las difikultades azen las personas fuertes (güçlü) las reushitades (başarı) azen las personas briyantes (ışıltılı), i la felisitad (mutluluk) aze la persona dulse.
Kada anyo es un aparejo de lo ke se va merkar a su namorado i kale ke le aga plazer. Syempre fyestaremos estos dias ke azen plazer a la persona kon muncha felisidad…
El 19.02. Djugeves la noche, uvo la komemorasyon de primer anyo, de un platano (çınar) de
muestra komunitad: Elie Perahya (ke este en ganeden), ke era un savyo, un ombre de kultura emportante.
El era el monumento de la byenfesensya, de la kerensya i ermandad, kon modestiya i semplisitad.
Una partida de su famiya, amigos, personas de la komunitad asistyeron a esta komemorasyon ke tuvo lugar en la sinagoga Neve-Shalom.
La rikeza de una komunitad es; las eksperyensas de los aedados ke fonden los pontes entre lo pasado.
i el avenir. Elie Perahya lavoro muncho por muestra komunitad de alma i de korason. Eskrivyo artikolos en ladino, kon un diksyonaryo presyozo en djudeo-espanyol, kon su kompanyera Klara. El kapo de la oja del djudeo-espanyol del jurnal “Şalom”.
El desho ovras i su nombre. Ke su alma repoze en ganeden. Sueto de nombrarlo al anyo vinidero kon muncha djente!
