Ninet BİVAS
Arel tres anyos i medyo es el inyeto grande. Tyene una ermanika de 10 mezes. Es el sigundo anyo de Arel en la eskola de Ulus. Komo todos teniya 15 diyas de vakansas i es el dever i el plazer de las grand mamas de okuparse de los inyetos.
Demayana denprano me hui para okuparme de los inyetos. Dospuez de jugar dos oras le propozi de ir a İstinye Park el sentro de merkansiya (alışveriş merkezi) para pasar una ora diferente. Unas kuantas vezes disho ke no kere. Dospuez de suyo vino dizyendo ke keriya irse. Lo asenti dedetraz del koche(araba) i en sinko puntos arivimos.
Pasimos el kontrol de segurita i entrimos al otopark. Kon alta boz dishe azeremos atensiyon en kual otopark estamos. Porke envezes me olvido ande estava i toma tyempo de topar el lugar. Pishin me vino la repuesta de detraz.”El otopark 2 kolor vedre”.Ya kedi enkantada. No esta de komparar la mueva jenerasyon kon muestro tiempo ni kon la de sus padres. Suvimos de las eskalers i justo enfrente chikolatas i dulsurias. Siguro ke ensistyo ma rezisti porke ya aviya komido en kaza 5 pedasos de chokolat.
Teniya de merkar kozas del merkado(Pazar). En indomos por un largo kamino se merikiyo i me demando: aki no se topa magazen de juetes? En la mano teniya una espada (kılıç) de plastik ke me demando la permisyon si la pudiya tomar encuntos. En merkando la zarzavat el estava meneyando la espada a los del entorno.
Enfin pasando por un magazen de juetes sin mirar atras avanso direktamente aryento. Bushkimos 15 puntos aki aya i a la fin salimos kon dos otos chikos. Abashando las eskaleras para ir al otopark kuriyozo me demando:”Ande moz estamos indo?” “Al otopark” le respondi. “Kualo estamos tornando a kaza sin komer una koza?”
Otravez me kedi enkantada. Tornimos atraz. Entrimos en una patiseria, le amostri los gatos; disho ke kere komer una dondurma. Le respondi ke dondurma yay en kaza. Kon un tono muy deçidido afirmo ke keriya komer la dondurma en al patiseria. Bienentendido ke en komyendo el yelado de si para si tomo grande pedasos en la boka i empeso a gritar ke se le estava yelando la boka.
Ansi se termino muestra aventura de un diya de vakansyas.
