El filmo de animasion dokumanter de Ari Folman ‘Waltz with Bashir’, un filmo sovre las orores de la gerra de Lebanon (1982), gano un premio muevo los diyas ke pasimos. Este filmo fue elijido komo el mijor filmo etranjero en los premios Cesar de Fransia.
Ari Folman es el primer direktor israeliano ke gano un premio de la Akademia del Sinema Fransez.
‘Waltz with Bashir’ tambien resivio el premio del mijor dokumanter por los ‘Writers Guild of America’, gano el premio del mijor filmo etranjero del ‘’66th Golden Globe’ en Hollywood, i fue nombrado el mijor filmo del anyo por la Sosiedad Nasional de Kritikos de Sinema.
En este filmo, Ari Folman esta kontando sus rekodros komo un soldado durante la gerra de Lebanon, i durante la matansina de Sabra, i Shatilla en Beirut.
Ari Folman utilizo animasion kreada en el komputador para kreyar un imajen poderozo i surrealisto de la gerra, i en mezmo tiempo amostrandomos komo en vezes la memorya mos djuga djugos.
‘Waltz with Bashir’ fue aparejado en Lebanon ma fue enterdido de amostrarlo en los sinemas de Lebanon.
Este filmo tambien fue nominado por Oscar komo el mijor filmo en lingua etranjera, ma komo lo savemos no resivio un premio.
‘Waltz with Bashir’ esta reprezantando el sinema kontamporeno de İsrael, en la manera la mas direkta i la mas konsantrada.
En los anyos dalkavo, la endustriya del sinema israeliano, se konvertio en uno de los mas enteresantes del mundo. Ma la Presa Etranjera de Hollywood votaron en favor de este filmo porke esta reprezantando el filmo kontamporeno ke esta floresiendo en İsrael.
‘Waltz with Bashir’ resivio estos premios tambien por su orijinalidad i por el koraje de sus kreadores. Mezmo siendo un filmo politiko, kuando lo eliminamos de su kontekto historiko i politiko, vemos ke es un filmo ‘kontra la gerra’. Esto es una de las razones deke este filmo fue tanto apresiado en İsrael.
En sus diskorsos, kuando Ari Folman resivio sus premios, el avlo de su vizion de pas, ke es, komo lo savemos todos, el mas ermozo esuenyo de İsrael, i del Medio Oriente.
