Purim fue fyestado en el Kaal Ahrida de Balat
Komo lo kere una vyeja tradisyon, la fyesta de Purim fue selebrada Alhad el 8 del mez koryente, en la antigua i ermoza Kehila “Ahrida” de Balat, en prezensya del Gran Rabbino “Rav İsak Haleva”, del prezidente de muestra komunidad “Silvyo Ovadya”, del konsul jeneral de Israel “Mordehai Amihai”, de los myembros del Bet Din “Rav Moşe Benveniste” i “Rav Naftali Haleva” ansi ke de una nombroza asistensya kompuesta de notavles i yahidim de muestra kolektividad. El programa fue riko i komo kada anyo yeno de avlas muy interesantes, de kantes I de espektakolos rememorando la fyesta de Purim.
Syempre felisidad en el korason de Berna i Alper Adatoz
Es kon una immensa alegria ke anunsyamos el kazamyento,alhad el 8 del mez koryente, en la grande Kehila Neveşalom adornada de flores i yena de emosyon, kantes i rizas ,de la pyanista Berna Sidi ija de una de los kapos eskritores del Şalom “Süzet i Albert Sidi” kon Alper Adatoz ijo de Perla i Moris Adatoz. Felisitamos sinseramente las famiyas “Sidi” i “Adatoz” i auguramos a Berna i a Alper una unyon syempre yena de amor, kerensya i alegria.
Jak Kori loreato de la selebre kompetisyon kultural “Question pour un Champion”
Eramos nombrozos djueves pasado delantre el ordenador i vyernes la tadre delantre la televizyon Franseza a sigir kon grande emosyon la selebre kompetisyon kultural “Questions pour un Champion” a la kuala partisipo kon muncho briyo muestro amigo i kolavorador Jak Kori. El fue el loreato del grupo Turko kompuesto de partisipantes todos de grande valor i de vasta kultura jeneral. Muestras kalorozas felisitasyones a Jak Kori ansi ke a todos los ke partisiparon, eskojidos eyos mizmos entre 75 kandidatos.
Interesante teksto sovre la vyeja sivilizasyon Kineza
La semana pasada, tuve la oportunidad de meldar un muy interesante lavoro de investigasyon bibliografika al sujeto de la antigua sivilizasyon Kineza, lavoro echo por muestra amiga Süzet Fransez. El teksto es riko, yeno de informasyones sovre los uzos i kostumbre, kreensas i sovre todo presyoza sagasidad de este immenso İmperyo ke supo mantener sus tradisyones ansestrales a traves los milenaryos. La autora mos avla tambyen de la prezensya djudia desde numerozos siglos en estas tyerras leshanas ke oy mimzo mos paresen difisilmente aksesivles. Un muy interesante paralelo es trasado entre las dos sivilizasyones las mas vyejas del mundo, las kualas supyeron guadrar intakto (malgrado numerozas visisitudes) el patrimonyo kultural i kultual de los antepasados: “la Kineza” i la “Hebraika”, la primera bazada sovre la filosofia de Confucius, Buddha i Lao Tzu, la segunda sovre el humanizmo i universalizmo de la Biblia i partikularmente del Dekalogo. Muestras sinseras felisitasyones a Süzet Fransez.
Vijita muy amistoza de la ministra Hillary Clinton en Ankara
Durante su vijita en Ankara, Hillary Clinton Ministra de los Echos eksteryores Amerikanos enkontro el Primer Ministro Turko Tayyip Erdoğan i el Ministro de los echos eksteryores Ali Babacan en una atmosfera de grande amistad. Eya ekspreso su grande plazer de toparse de muevo en Turkia i afirmo ke fuertes relasyones de aliansa i kolaborasyon egzisten entre los dos payizes, los kualos kontinuaran syempre a ovrar endjuntos por la paz i el desvelopamyento del Oriente Medyo. Eya deklaro tambyen ke “la Turkia tyene en su korason un lugar espesyal”.
