La vida mos ensenya ke ay valores al pareser chikas, ma en realidad muy importantes, las kualas mos mostran munchas vezes el kamino a segir en momentos de desmamparo i mos salvan del dezespero
Un drama desgrasyado se paso la semana pasada en Almanya. Un manseviko de 17 anyos, de famiya bastante rika, elevo medyokre ma de kondukta relativamente korekta, un pistol en la aldikera, se rendyo un dia a la eskola ke el no pudo terminar por insufizensya de lavoro regular, i travo syegamente sovre nombrozos estudyantes.
Desfortunadamente no es el uniko kavzo similar; desde unos kuantos anyos, semejantes djestos kriminales se repetan kon una frekuensa de mas a mas grande.
Djesto de lokura imprevizivle? Por seguro si... en todo kavzo, por un largo momento, mos demandamos ke suma de dolor i de frustasyon pudo aver detras de el... Revolta kontra todos los ke lo trespajaron? ravya kontra si mizmo, kontra su propya inkapasidad ? Akto de nihilizmo komo una ultima posibilidad de afirmarse?
Ya devia por seguro aver una frajilidad mental en el, al pareser no muy grande visto ke los ke lo konosian no relevaron asta el dia de la trajedia nada de grave. Ma, ke fue el motivo determinante?
Entonses, una otra pregunta mos vyene al tino. Es ke este mansevo ke fue la kavza de uno de los dramas sosyales los mas dolorozos es el solo responsavle?
Son inkontestavlemente kestyones ke mos sovrepasan, mas fuertes ke muestro simple entendimyento i muestra kapasidad de razonamyento, ma en muestra kualidad de kriansas pensantes, de ombres i mujeres sensivles, de padres, madres i avuelos, no mos es posivle de kayarmos.
Es ke realmente transmetemos a la manseves las verdaderas valores de la vida? No solo las sofistikadas ke en la epoka prezente realsan el prestijyo del individuo, puede ser muy presyozas en eyas mizmas, ma tambyen las otras, las chikas ke son komunes i aksesivles a todos, simples en sus esensya, komo por egzempyo la sola kualidad de ser un umano, de kerer ayudar kualkunke se topa en sirkunstansyas difisiles, de saver oir, sonriir, komunikar.
Es ke les ambezimos la immensa importansa de una palavra sinsera, byen sentida o mizmo de una simple presyon de mano en un momento de apreto, todo lo ke kada uno (a la dimensyon de su propyo pueder) tyene la posibilidad de azer?
La edukasyon moderna se olvida envezes lo ke es la ensenyansa de estas chikas valores, la ermozura de un lavoro manual byen echo, la importansa de las relasyones entre personas, el plazer de dar komo de resivir, interkambyo perpetual ke enrikese kaji al mizmo grado ke los livros filozofikos los mas profundos.
Desde mas de un siglo, la egzistensya devino una immensa kompetisyon, una tentativa loka a ser en kada koza mas adelantre ke los otros, mas fuerte, mas performante. En un mundo dedikado prinsipalmente a las valores materyales i a la meritokrasia, es ke tenemos syempre konsensya ke a eyos solos, estos chikos aktos pozitivos konfirman la valor de la vida?
