Alegria en las famiyas Daniyalzade i Rozales
Alhad el kinze marso en el kal Neve Şalom adornado por la sirkunstensya, Teri ija de Rozi i Yaşar Daniyalzade myembro del konsilyo de administrasyon del Şalom, auno su destino al de Sabih ijo de Vivet i Saül Rozales, para una larga vida de amor i felisidad. Ke sus futuro sea syempre yeno de luz de paz i de armonia.
Muestras sinseras felisitasyones a las famiyas Daniyalzade i Rozales.
El sinkyen forum mundyal de la “Agua”
Del 16 al 23 del mez koryente Estambol es el testigo de una de las mas grandes aktividades del mundo. Mas de 23 temas konsernando la Agua seran tratados en 100 reunyones. Uno de los objetivos de estas sesyones (a las kualas partisipan syenes de altos reprezentantes de varios payizes) sera de azer de la agua un sujeto politiko i de rekojer todas las propozisyones konkretas ke seran prezentadas afin de transmeterlas a la opinyon mundyal. Se aspera aproksimativamente 20.000 partisipantes, entre los kualos ministos de varios payizes. Rekompensas i distinksyones seran distribuidas. El Forum 5 invita las administrasyones lokales a tomar las mezuras nesesaryas i a engajarsen a segir varios kriteryos primordyales. El Forum Mundyal de la Agua se organiza kada tres anyos kon la kontribusyon del Konsilyo Mundyal de la Agua, el kual kolavora kon el payis ande este kongreso tyene lugar.
Muestro amigo Selim Salti onorado por la administrasyon de la Universidad Bar Ilan
El 12 Marso 2009 muestro amigo Selim Salti tuvo el onor de ser nominado myembro del Konsilyo de Tudela de la Universidad Bar-Ilan (member of the Board of trustees). El es el primer “ladino avlante” de este Konsilyo i por seguro esto kontribuira a un mas grande adelantamyento de la kultura sefarad al seno de la Universidad. Ekspresamos muestros sentimyentos de kontentes a muestro kerido amigo i lo felisitamos por el ermozo lavoro ke el kumple.
Un tratado de kolavorasyon fue parafado entre Netanyahou i Lieberman
Alhad el 15 del mez koryente un tratado de kolavorasyon fue parafado entre Benjamen Netanyahou prezidente del Likud i Avigdor Lieberman kapo del partido Yisrael Beitenu, el kual insiste kategorikamente sovre el mantenimyento de las kolonias Isreaelyanas en Sisjordania contra las tyerras sovre las kualas biven los Arabos Israelyanos, i tambyen el egzije ke todos los Israelyanos djuren en afirmando sus lealdad enverso Israel.
Ay grande probabilidad ke la funksyon de “Ministro de los Echos Eksternos” sea konfiado a Avigdor Lieberman
Este akordo es un primer paso para la formasyon de un kabineto ke sera prezidado por el Likud, lo ke no empide Natanyahou de tener varios enkontros kon la prezidente de “Kadima” en el buto de formar una Unyon Nasyonal.
Tzipi Livni de su parte egzije un Estado Palestinyano independyente “Dos estados para dos puevlos” i tambyen de persigir el “Proseso de Paz “ engajado en la Konferansya de Annapolis
