Syempre felisidad, kerensya i amor en las famiyas Hakmen i Asael
Alhad el 22 del mez koryente, es en la alegria, lo kantes i la emosyon jeneral ke se selebro la boda de “Seren” ija de Tilda & Yüksel Hakmen kon “İzzet” ijo de un myembro muy performante de la Matan Baseter Grasiela & Selim Asael. El Dyo ke los bendiga i ke sus vida komun sea syempre yena de logros, gozos i kontentes. Muestras sinseras felisitasyones a las famiyas Hakmen i Asael.
Soldados Israelyanos akulpados de abuzos de agresividad
Komo desfortunadamente es frekuente en tyempo de gerra ,segun la afirmasyon de syertos testigos, unos kuantos soldados Israelyanos son akulpados de abuzos de ravya eksesiva kontra ninyos i personas aedades del partido adverso. Israel tomo immedyatamente la desizyon de avrir una enkuesta a este sujeto.
Obama revoltado kontra los premyos egzorbitantes akordados a syertos direktores de grandes Institusyones
La ravya de Barack Obama fue grande kontra los premyos eksesivos ke se estan distribuendo oy en dia, en tyempo de grande kriza ekonomika, a algunos direktores de bankas i grandes institusyones, sovre baza de kontratos anteryores. Mezuras seran tomadas para rekuperar legalmente una partida de semejantes montantes, por medyasyon de empuestos byen justifikados.
Un akordo de kolavorasyon entre Binyamin Netanyahu i Ehud Barak
Martes 23 del mez koryente la prensa Israelyana anunsya la konkluzyon de un akordo de kolavorasyon entre Netanyahu i Barak, malgrado las retisensyas i la deskontentes de una partida del partido travayisto Israelyano.
