Visto ke se aserka la fiesta de “Pesah” el Bet Din Atsedek toma la inisyativa de trayer a la konosensya del onoravle publiko las enformasiones siguentes:
1) Este anyo el proseso de “Taanit Behorot” tendra lugar la manyanada de mierkoles el 8 Avril a las oras 07:00 en la sinagoga de Caddebostan i a las oras 07:30 en la sinagoga de Şişli, en Neve-Şalom i en la sinagoga de Ortaköy.
2) La ora de “Biur Hamets” i de no komer mas “Hamets” es 09:45
3) La “Matsa” i la “Matsa Molinada” emportada de İsrael markada “Aviv” esta en vendida a vuestro provecho.
4) El vino “Kasher Lepesah” enbotelado en la azienda “Kavaklıdere” debasho el kontrolo de nuestro Rabinato tambien esta en vendida a vuestro provecho.
5) El kezo blanko, kashkaval i otros djeneros de kezos “Kasher Lepesah” produktados debasho el kontrolo de nuestro Rabinato i markados “Taim” estan tambien en vendida a vuestro provecho.
6) El iğo seko, la pimienta i la asukar madjada “Kasher Lepesah” esta tambien en vendida el las karniserias i en las botikas ke venden produktos kasher.
7) Las dulsurias “Kasher Lepesah” se pueden enkomendar de las ovras Or Ahayim i Mişne Tora.
8) Las ovras İYD, Barınyurt la firma Robelyu i Kafe Bella estan abastesyendo senas “Kasher Lepesah” a los ke se aderesan a eyos i enkomendan.
9) En la botika “Koşer” ke es en Caddebosten se puede topar diversos produktos de komito “Kasher Lepesah”.
10) El restorante Levi sera avierto en los dias de medianos kon komidas “Kasher Lepesah”.
Siendomos muy konvensidos ke nuestros korelidjionarios Yisrael Kedoşim no van mankar de dar la alta emportansa i konsiderasion a los preseptos de nuestra santa ley, kedamos bendizyendovos kon un kalorozo MOADİM LESİMHA i HAG PESAH SAMEAH.
