Reaksyon de Israel kontra la triste avyertura de la konferensya “Durban II”
Despues de aver agradesido Los Estados-Unidos i todos los payizes ke (en sinyo de protestasyon kontra las difamasyones del prezidente Ahmedinejad enverso el puevlo Israelyano) avian refuzado desde antes la konferensya de asistir a kualkyer sesyon de este adjuntamyento, Israel manifesto una fuerte reaksyon kontra los tristes eventos ke se produzyeron Alhad i Lune en Djeneva.
El Ministro de los Echos Eksteryores Israelyanos yamo (por konsultasyon) su embashador en “Suisa” por kavza del enkontro de Ahmedinejad kon su omologo en este payis. I en mizmo tyempo ekspreso la deziluzyon del puevlo Israelyano a la sigida de la akseptasyon de la Fransa i de la Ingiltera de embiar un reprezentante a esta konferensya.
La konferensya “Durban II” undida en el rasizmo
La konferensya “Durban II” ke era destinada a luchar kontra el rasizmo, avyo paradoksalmente sus puertas kon una avla esensyalmente rasista, pronunsyada por el prezidente Iranyano Ahmedinejad, lo ke no fue una sorpreza para ninguno. Alhad el 19/4, un dia antes de la konferansya, el ya avia utilizado las mizmas palavras de falsas akuzasyones kontra Israel i avia repetado su intisyon de eliminarlo de la karta jeografika.
Este malorozo insidente ke reprezenta la negasyon mizma de lo ke devia ser esta konferensya, provoko la reaksyon de todos los delegados de los payizes Evropeos ke se izyeron un dever de abandonar la sesyon.
