El odyo no puedre nada kontra el odyo Solo el amor puede venserlo Budha Lunes, ken en la sinagoga ashkenaz, ken en la soledad de su kaza, todos mo rememorimos la fin terrivle de las viktimas de la Shoa, de milyones de ombres, mujeres, ninyos, ninyas, djudyos i no djudyos, milyones de personas, kada una kon sus kreensas, sus konviksyones, sus proyektos i sus esperansas, milyones de kriansas umanas en la angusya i el dezespero, kada una arrankada al amor de un serkano.
No se trata solo de las viktimas del antisemitizmo, ma de todos los ke fueron eksterminados indjustamente por sus orijen o sus konviksyones diferentes...
Kada anyo mos demandamos “deke?”, en la inkomprensyon de esta krueldad, i ainda syenes i syenes de anyos la umanidad va formular la mizma pregunta. No avra nunka, no kale ke ayga sasyedad ni saturasyon a este kestyonamyento...
Si... kada anyo repetamos la mizma kestyon, ma fideles al presepto bibliko “ni el padre pagara por la falta de su ijo ni tambyen el ijo por la del padre”, el puevlo djudyo supo guadrarse de resentir un odyo perpetual enverso los desendyentes de los ke komotyeron estos krimenes.
El jenosidyo perpetrado en un mundo ke se dizia sivilizado, en la indiferensya de munchos payizes ke puedian si no evitarlo enteramente ma a lo manko amenguar su volumen, no konserna solo el puevlo djudyo ferrido en sus karnes i en su egzistensya. El jenosidyo es la fayita del ser umano en su dinyita de kriansa pensante, la fayita de siglos de sivilizasyon, de kultura, de lucha insesante para ke en la persona subsiste el “homo sapien” i no la bestya salvaje.
I todo el tyempo ke en un lugar serkano o leshano del mundo, semejantes aktos kriminales akonteseran, sin ke ninguno aga un esforso para arrestarlos, el perikolo subsistera.
Devemos afirmar ke paradoksalmente es prioritaryamente a mozotros djudyos (ke konosimos la desgrasya en su absoluta krueldad, fizikamente ansi ke sentimentalmente), ke inkumbe el dever de vijilansya enverso kualkyer delito sanginaryo ke puedra ser perpetrado por kavza de prejuisyos rasyales, en ke lugar del universo ke sea i kuala sea la viktima, amiga o enemiga. Nunka permeter la indjustisya, nunka permeter el refuzo del otro; saver akseptarlo este otro, kon sus diferensyas (tanto ke eyas no yevaran en sus entranyas premisyos de odyo)... saver akseptar sus derechos lejitimes, mizmo si eyos no mos konvyenen...
Tenemos menester los unos de los otros en sus diversidades, tenemos menester del otro ke mozotros, komo el otro tyene tambyen menester de mozotros. Ninguna sosyedad serrada sovre si mizma no pudo rezistir a la degradasyon ke inflije la soledad del egosentrismo.
