Ninet BIVAS
La noche de seder estavamos envitados ande mi ija.Ya vos konti ke el inyeto grande Arel de tres anyos i medyo se va a la eskola Judiya.En echando un ojo a la meza ke veygo allado del chini de Arel; una esponca kolorada de alimpyar el mupak apegada de las dos puntas. Aryento una kuchara de plastik blanka desinado ensima ojos i mushos. Kualo es esto demandi kon kuryozita. La repuesta me sorprendo: Moshe en la barka. Allado un manteliko blanko eskrito ensima kon pintura: Arel i Pesah. Devo de dizir ke aparejaron muy bueno a los ijikos en la eskola. Unas kuantas vezes enturumpyimos el seder porke el inyeto teniya de eksplikar lo ke se paso en Misrayim.En dandose a la kara un karakter kruel moz konto: aviya en Misrayim un rey muy negro. Alevantando el braso por ariva: Paro. Los Judyos estavan lavorando duro i keriyan fuir. No los desho. El Dyo le embiyo negras kozas: Animales krueles; imitando lo ke azen los animales. En anunsyando piyojo kon las doz manos izo kom se estava araskando. De vez en kuando estava mirado al padre para ke le akodre si le mankava siertas kozas.
Anbezandosen de una forma teatral estos elevos chikos ya empesaron a tomar la erensya kultural de sus ansetros.
