Keridos lektores, oy vos kero embiyar estos versos ke topi entre mis dokumentos. No me esto akodrando kuando me pasaron a la mano, i komo yo no los meldi asta agora!..Son muy semples, ma portanto indo direktamente al korason. La verdad ke los meldi kon grande emosyon. Tyenen i una doza de realismo i de Historya, en sus semplisidad. Estas linyas las tomi de una kantika de aninar, bastante larga. Fui ovligada de akurtar, i esto, lo ize kon muncha ezitasyon. Porke, yo penso ke una poezia es el byen “ personal” del poeta. (Ya es verdad ke i poezias se estan tresladando...) Enfin, adapti tambyen la ortografiya, a la ke uzamos en jeneral, i finalmente, tresladi al Ladino, syertos byervos. Aki, demando ekskuzas al autor, de averme permetido esto ke ize. Ma, esto sigura ke, la poezia no pyedro nada de su karakter emosyonante... I, (mizmo si no es kompleta aki) en publikandola oy yo, va ser meldada por lektores ke no tuvyeron mas antes esta shans...
Kantika de kuna para un ninyo Djudio
No yores, mi ninyo,
No yores, mi alma,
Durme asta manyana.
Es de noche, ninyo...
Mira la ventana.
Tu madre te kere,
No temas mi alma,
Durme asta manyana,
Tu madre te ama.
Estas en tu kaza,
Estas en Israel...
No sonyes, mi ninyo,
K’estas en la Espanya
Durme otrun poko,
De la Inkizisyon,
Ke keman tu puerpo,
Por falso konverso,
En un akto de Fé...
No sonyes mi ninyo,
K’estas en la gerra,
Ayi, en la Alemanya
En el eksterminio,
Ke Nazistos te tyenen,
Ke te azen seniza...
Sonya byen, mi ninyo,
Durme i deskansa,
K’estas kon tu madre,
Aki en Israel..
Manadero:
(Cancion de cuna para un nino Judio). Ernesto Kahan- Avril- 2003.
