Aunke de una edad bastante avansada, no parvengo a despegarme del mizmo intereso (ke resentia 30 o 40 anyos antes) por mi entorno serkano komo leshano... el mizmo potensyal de satisfaksyon o de revolta delantre un evento ke djuzgo pozitivo o negativo, el mizmo sentimyento de entuzyasmo o de desepsyon segun la situasyon.
Oy en dia el estado de las kozas es mas komplekso, intrafikado en su kompozisyon ande lo bueno i lo negro paresen envezes mesklados el uno al otro de una manera inekstrikavle.
Por egzempyo, el periodo de los 100 primeros dias del muevo governo Amerikano ya vino kaji a su fin . Es ke una koza troko de una manera vizivle en el mundo? El mizmo marazmo ekonomiko, las mizmas rebueltas un poko en kada lugar del mundo, las mizmas revendikasyones munchas vezes kon razon de la klasa lavorante kontra el patronato, la mizma inkyetud para kualkyer padre de famiya de no pueder asegurar un avenir estavle a sus ijos (lo ke es komprensivle) i tambyen las mizmas egzijensyas justifikadas o no en la imposibilidad de resivir repuestas satisfazyentes, los mizmos dezeos del ser umano, munchas vezes artifisyales, kreados por un sistema loko de publisidad.
La realidad no puede trokar espektakularmente en el espasyo de tres mezes,ningun rezultado duravle puede ser immedyatamente vizivle.
Una koza es segura, en el kampo judisyaryo, munchos sistemas empesaron a trokar, lo ke empesara a dar sus frutos poko a poko ...el kamino asta la instorasyon de una situasyon optima es largo ma no utopiko.
Vinyendo a la kondisyon de vida en el mundo djudyo, no se de ke, sin razon realmente valivle, parselas de esperansa paresen bolar en el ayre ke respiramos... Por siguro nada justifika este sentimyento de optimizmo, nada de realmente alegrante,.chikos indisyos ke munchas personas van a konsiderar de insinyifikantes... puede ser la entrevista de Netanyahu kon su kaji omologo en Ayiftoto, su anunsyo de kerer empesar de muevo negosyasyones de paz , la perspektiva de su vijita en Fransya, su revendikasyon de un partenariato inkondisyonal kon la Unyon Evropea, lo ke prova su voluntad de aserkamyento kon el mundo eksteryor i puedeser manifesta la probabilidad de una akseptasyon de varios imperativos a los kualos kada uno de los dos partidos es sometido...
Una otra parsela de esperansa mos vyene de la abstensyon de 10 payizes, anunsyada antes la avyertura de la konferansya Durban II i kavzada prinsipalmente por la prezensya de Ahmedinejad ke avia pronunsyado un dia antes palavras inadmisivles enverso el Estado de Israel, tambyen ,aunke manko probante, la impulsyon ke pusho los delegados de las komisyones Evropeas ke asistyeron a la sesyon, de alevantarsen immedyatamente en sinyo de protestasyon kontra el diskorso yeno de odyo i de indjuryas ke reitero el mizmo personaje politiko...
Ay tambyen probabilidad ke esta esperansa sea simplemente kavzada por el solo fakto de ambezarmos kel prezidente Amerikano organizo personalmente en la Kaza Blanka, un pranso de Seder por la segunda noche de pessah. İ, el dia de la komemorasyon de la Shoah, su prezensya en un servisyo de dolyo ansi ke su mirada komprensiva i su abraso a un vyejo reskapado del jenosidyo ke vimos sovre una fotografia ke publiko el djornal Israelyano “Jerusalem Post”.
Es ke esto puede konstituir una baza valivle para un soplo de esperansa? İmposivle de pueder responder a esta pregunta ... Puede ser ke se trata unikamente de un simple menester de esperar...de kreer.
