Los dalkavos diyas de pesah la eskola estava serada i Arel mi inyeto tanbien en kaza. Estos primeros diyas de sol de primavera no kale peryer. Kon los doz inyetos mos dirijimos verso el park. Si izitesh atensyon de unos kuantos anyos parki munchos parkos se fraguaron en Estanbol. Estava arepushando la puset de la ermanika; dame la mano le dishe en alevantando la mano derecha. “No, te va detener la mano siedra”. Komo siempre el kontraryo de lo ke le dizen. En el parko se kijo kunar. Lo asenti ensima de la kuna i empesi a arepushar. Mas presto! vino el orden. A la kuna de allado vino una ijika de 3 anyos kon una kukla en la mano. La asento la kukla delikatamente en la kuna i mirandome la arepusho kon fuersa. Komo la kukla no peza nada, la kuna se hue de un lado para el otro. “Aze atensiyon” le dishe a la ijika. Pishin salto Arel i le demando: “Tu kuando te vas azerte grande?” Una insulta para estos anyos. “Yo ya teniya aniversaryo”respondyo la ijika. Kuando abasho Arel de la kuna 4 ijikos de 8 anyos vinyeron jugar. Estavan suvyendo el “kay kay” por arrovez, koryendo en las alturas. Arel sin tener en konsiderasyon ke los ijikos estavan el dopyo de su edad menasandolos kon el “kroshe” de plastik de piratos (korsan) en la mano. Eyos se empesaron a riyir. Justo kuando le ivan apegar una dada empesi a gritar: “Arel”! Uno me izo un grande kompliman: “İjikos vino kon su madre”. Solo uno entre eyos koryo dedetras de Arel i le dyo una dada. “Me encido, se kecho Arel. “Te vas a ambezar a no inyervar la cente” le respondi. Mas dospuez se entraron ande se cuga basketball. Entre los teles por ahuera Arel les estava amostrando el kroche de pirates. Un ijiko kon furya salyo ahuera i empeso a koryer detetars de Arel. Empesi a gritar i dizir “es ansi ke vos komportash kon los chikos?” Los amigos salyeron ahuera i gritaron a sus amigo eksplikandole ke es chiko i no esta azyendo nada ke menasar. El sol se empeso a guadrar dedetras de la nuves. Tomimos el retorno akompanyadomos por el ayre fresko.
