|
Es otra koza de toparse en el partido de la opozisyon, pronto a saltar sovre el meno defekto o retardo de egzekusyon de un proyekto, i otra koza de estar a la kavesa de un Governo, en el korason mizmo de lo ke se puede yamar el kampo de batalya de un Estado ke gerreya por su supervivensya, no solo kontra enemigos konfirmados, ma tambyen (lo ke es el kavzo esta vez) kontra enemigos potensyales , delantre problemas ke paresen a primera vista sin posibilidad de ser rezolvidos i ke tyenen el poder de komprometer o de determinar el destino mizmo de un puevlo.
Si, es otra koza de estar delantre la meza de komanda,en la immensa soledad de una responsabilidad asumida voluntaryamente, de toparse facha kon facha kon un puevlo difisil a dirijir, en una situasyon sosyo-jeografika eksepsyonal yena de problemas munchas vezes imprevizivles i sovre todo de tener a responder a un entorno rekalsitrante pronto a saltar sovre vos, kon o sin razon .
Kontraryamente a la haya dirijida, eya, unikamente por su instinkto de konservasyon, el ombre tyene su libre arbitro, su posibilidad de perseverar de una manera syega en sus primeros puntos de vista o de adaptarse a muevos estados de kozas.
Ansi, meldamos desde unos kuantos dias en el kotidyano elektroniko Israelyano “Haaretz “ unas kuantas novedadess ke personalmente konsideri pozitivas i ke kero partajar kon los lektorer del Şalom.
Alhad pasado 2/5/2009: “avizo del enkontro Martes el 4/5 en la “Kaza Blanka” entre el prezidente de los Estados Unidos kon los de Ayifto, del Puevlo Palestinyano i del Estado de Israel, afin de diskutir al sujeto de Negosyasyones de Paz.
Tambyen, en la mizma emisyon elektronika,el Haaretz mos komunika una refleksyon de Ehud Barak (aktual ministro de la Defensa Israelyana, shefe el mizmo de un partido adverso al dirijente) sovre el prezente primer Ministro Israelyano i su Ministro de los Echos Eksteryores: <Natanyahu more mature, Lieberman more balanced than he seems>
Natanyahu mas maduro, konsyente de los formidavles desafios delantre los kualos mos topamos.
Lieberman mas ekilibrado detras de las puertas serradas de una sala de diskusyon ke lo ke el mos dyo la impresyon kon syertas de sus deklarasyones publikas.
Lunes el 3 Mayo: “Dr.Michael Oren”, kandidato de Netayahu al posto muy importante de emisaryo İsraelyano en los Estados Unidos.
Por tener una idea de la manera de pensar de este personaje, kale saver ke en una de sus konferensyas, el Dr. Michaell Oren, profesor vijitador en la Georgetown University de Washington, disho el mez pasado, ke la sola alternativa para Israel de salvarse en tanto ke “Estado Djudyo” es de retirarse unilateralmente del “Wesr Bank” (oriya oeste) i de evakuar la mas parte de los “Settlements” (establesimyentos, lo ke yamamos kolonias).
Martes 4 mayo: Deklarasyon de Shimon Peres delantre el Loby Amerikano pro Israelyano AIPAC; “Tengo la konviksyon ke Barack Obama tyene la kapasidad de trokar la Kriza en Oportunidad i tambyen (muy importante de la parte de un prezidente): “Netanyahu kere entrar en la Historya en fraguando la paz”. | 
