|
Esto es el nombre d’un proyekto, lavoro kolektivo i una ekspozisyon importante. La inogurasyon tuvo lugar el Alhad 3 Mayo, empesando kon un kokteyl, en los salones de muestra unika eskola djudia, U.Ö.M.L. Me topi aya muncho antes de la ora anunsyada, de sorte ke tuve bastante tiempo de kedar delantre de kada ovra. Lo digo syempre, yo no so kritika de Arte. Ma, Alhad la tadre, en kontemplando los tablos, no tuve menester de azer dingun komentaryo. Bastava ser Djudio, para entender sus sinyifikasyon en el fondo del korason. Fuimos arresividos por Esti Saul i Ester Asa. Esti es la koordinadora artistika i partisipo kon kuatro lavoros. Syenteremos Ester Asa, la instigadora, la madre de la idea (komo se dize) del proyekto: “Empesi azer el plano d’este lavoro,despues de aver visto en una galeria de Venezia, un rulo de la Tora, ande estavan pintadas las perashas.” Ester partajo su idea kon la Komision d’İnstruksyon del Gran Rabinato, ke dyo kon entusyazmo su aprobasyon. Desidaron de demandar el ayudo de Esti Saul por la koordinasyon kon todos los artistos, amator o profesyonal. Aki estan los nombres en orden alfabetiko: Beki Almaleh, Betsi Kebudi, Claire Andjel, Emili Şayir, Estel Lita Russo, Esti Saul, Etel Anter, Eti Koen, Fanny Taranto, Fortüne Asseo, Jale Aldiş, Jasmine Taranto, Jozef Habib Gerez, Korin Gavrieloğlu, Lika Ören, Max Machoro, Musa Albukrek, Röne Batı, Sara Hatem, Selim Yuhay, Selma Ertovi, Seyfi İshman, Verda Habib, Viktor Hayim Bahar, Virna Saul, Vivi Menase, Vivyan Varon. (*) En este proyekto, no solo pintadores, ay tambien artistos d’Ebru, i los lavoros de “Patch-work” de Eti Koen. No kero aravyar a dinguno de los presyozos partisipantes, ma, reelmente el lavoro de Eti no se puede kontar kon byervos, kale verlo. El eskopo del proyekto es de ekspresar en la tual o otro materyel, las 54 perashas de la Tora. Aun ke es un lavoro kolektivo, kada artisto, despues de aver tomado el nombre de la (o las) perasha ke iva komentar, kedo libero de ekspresar su idea orijinal, sus sentimientos i impresyones... Libero de emplear todo modo de teknika de pintura de su preferensya, sin dinguna restriksyon. En las reuniones, los partisipantes fueron informados del eskopo del proyekto. De livros i dokumentos manaderos, meldaron las eksplikasyones de kada Perasha. Para pueder komentarlas, tomaron tambien konsejos de los Raves de muestra Komunita. A la fin de una larga perioda de lavoros, el proyekto fue kompletado i koronado kon el livro “ La Tora en Fotografias”. Estas fotos fueron travadas por İzzet Keribar i se topan tambien en un Rulo de Tora ke va ser ekspozado al lado de los tablos orijinal. En primero en U.Ö.M.L, i despues en los salones del Sentro Kultural Neve-Shalom. La aktividad del 3 Mayo kontinuo en el “Amram Auditorium”. Los oradores eksplikaron el eskopo i konsepto del proyekto. Sigiendo, en una kurta seans de “barcovision” fueron projetaron de muevo los tablos, djuntos kon el nombre de kada perasha i pintador korespondente. Fueron todos envitados a la shena, i felisitados por Su Eminensa el Gran Rabino Haleva. Reelmente bivimos una nochada inolvidavle, muy reushida. Achakes de mi espasyo limitado no tengo la posivilidad de entrar en mas detalyos. Kero terminar mis impresyones kon los byervos del Sr. Habib Gerez, duyen artisto de muestra Komunidad. “..Despues de este proyekto devemos produizir i otros, para konfirmar ke la Komunita Djudia tiene a dizir mas, en el domeno del Arte” (*) Espero ke es egzakta esta lista ke me dyeron... |
