Komo la sola lukanda kasher se sero atras poko Barınyurt organizo una nochada de Döner. En Büyükada el enverano ya tenemos la okaziyon de komer Döner kasher. El invyerno no tenemos la posibilita de topar. En la terasa de Barınyurt kon la maz ermoza vista de Estanbol: Topkapı, las mishkitas, la entrada del Bosfor, luzes komo en los kuentos de mil i una noche. Los ke sintyeron vinyeron i entre estos tanbien Arel el inyeto de 3 anyos i medyo ke no manka de demandar kuando vamoz a ir a komer döner. Desparte la savroza komida Arel se topo aya una amiga de 5 anyos kon kokitas i fostan emprime. Enprimero kon diferentes kalemes estavan azyendo desenes sovre papel. La ijika ke ya se anbezo las letras i los shifros se sintyo superyor a Arel;” yo ya se eskrivir ma tu danyda no te anbezates”! Enpesaron a koryer de un lado al otro. Eskondyendosen debasho de los manteles i salyendo en supito kada uno de debasho de una meza diferente. Unas rizas fuertes, eksklamasyones, la surpriz del rankontro; no puediyan topar un pasa tyempo maz ermozo. Ya kedaron aryento de la sudor. Las karikas koroladas komo la mansana. Las sudores eskuryendo po el lado de las karas. Las vistimyentas indo por un lado, los kaveyos enbaranyados. Verso la fin la amiga se kayo ensima de los dizes. Enprimero no afito nada. Kuando vino el padre para tomarla en los brasos enpeso a echar unos yoros fuertes. Arel ke estava mirando de konsolarla disho repetando unas kuantas vezes: “İ yo me kayi; ma no yori”. No me encido! No me encido! La nochada se eskapo todos kontentes i suetando de vinir a muchas organizasyones semejantes.
