Despues ke eskrivi mis rekuerdos sovre Lag Baomer, era muy natural eskrivir por Shavuot... Una de las las tres grandes fyestas, kon Pesah i Sukkot. Eskapando la “Sefirat Omer” de 49 diyas, en 6-7 Sivan, selebramos esta fyesta ke se yama tambien “Hag Habikurim”. Es el diya ke Moshe Rabenu resivyo la Tora, en el Monte Sinay. En primero pensi ke ya tengo muncho tyempo por eskrivir sovre Shavuot, porke oy dayinda estamos en el 10 de Mayo, “Diya de las Madres”. Asperando los ijos i inyetos ke ya vyenen d’un punto al otro, no tuve kualo azer. Mis penseryos se fueron a mi kerida Madre (de b.m) komo syempre en este diya espesyal. İ otomatikamente me yevaron otruna vez a mis chikos anyos, kon un sentimiento de eskarinyo i de nostaljiya...
De sorte ke este teksto se izo de si para si, asigun me dirijaron mis rekuerdos i mi pendola... En akodrandome de akeyos anyos, muy frekuente nombro dos lugares: Tekirdağ, ande pasava mis enveranos, i Galata. Ayi bivi diversas etapas de mi vida kon mis Nonos i Nonas. Sus filozofiyas, sus maneras de aserkarsen a muestras tradisyones, a la Relijyon, me influensaron tanto, ke oy en diya, despues de kaji 70 anyos, las tengo kon toda sus freskor en mi memorya i rekuerdo. Tambien mi Madre, bastante tradisionalista, perkuro a konservar estas tradisyones i a transmetermelas, a lo menos una partida.
Espesyalmente los anyos 41-42 fue la perioda... komo ke diga? La mas triste i pesimista de mi kriatureriya. Komo lo tengo ekspresado munchas vezes, mi padre estava azyendo su servisyo militaryo (20 Klasas). Tambien avli de las estrechuras, de la mankura de syertas kozas, espesyalmente de asukar. De sorte ke, afitava ke mi Nona o mi Madre no pudiyan azer las dulsuryas asigun lo dezeyavan. Seya la bimbriyada de Purim, la almendrada (masapan) de Pesah o el dulse de mansana de Rosh Ashana...
Ma, el enverano del 42, mi Madre mos estava rezervando una sorpreza. Asigun eya, era inadmisivle (kabul edilemez) de pasar la fyesta de Shavuot, sin azer el tradisyonal “sutlach de aroz”... İ kon este eskopo invyerno entero estuvo ekonomizando a la eskondida! (gizlice) pokas, pokas kantitades de asukar. Dunke, Shavuot ya estava en la puerta, i demas, la Primavera de akel anyo sintimos rumores (rivayet) dizyendo ke los soldados rezervistos ivan a ser liberados en serka. Estavamos asperando kon kuatro ojos, i kada sonetido de la puerta, kada soneriya estavamos koryendo a avrir...
Mi Madre kon la sukar sorpreza, se estava aparejando a azer este sutlach, ke le plaziya tanto a mi Padre. Azer dulsuryas de leche es una tradisyon de Shavuot, i nunka mankimos a esto. Komo se save, el otro nombre de Shavuot es “Fyesta de leche i miel”. Finalmente mi Madre izo el sutlach. Demanyana de mued, mi Nono se fue al “Kal de los Edirnelis”, aktualmente “Schneidertempel Sentro de Arte”. Era muy serka de muestra kaza. Lo asperimos i en el dezayuno mo lo komimos el sutlach, ma un poko desganados, deziluzyonados. El Papa miyo no aviya vinido...
Anyos pasaron... Despues de la Aliya de mis djenitores mos fuimos munchas vezes a Israel en Shavuot. Mi padre i mi marido viniyan de la Singoga, i komiyamos las borekitas de berendjena i el sutlach delisyozo ke aziya mi madre, i ke nunka reushi a azerlo komo eya... Oy, en este diya espesyal, otruna vez la esto nombrando en sintyendo su absensya. Ke su alma repoze en paz, Amen...
