Ay de esto unas kuantas semanas vos avia avlado de una muy interesante entrevista ke Albert Bensoussan de la revista “Information Juive” avia tenido kon Jacques Attali, autor del livro intitulado Dictionnaire amoureux du Judaisme” (diksyonaryo amorozo del Djudaizmo), livro de analiz i de refleksyon ke vengo de resivir, livro ke rekomendo kalorozamente a los lektores frankofones del Şalom.
Jacques Attali es universalmente konsiderado komo “grande eskritor”, “ekonomisto”, “historyano”, “editoryalisto”, “konsejero de varios dirijentes de Fransya” i a un syerto momento “direktor de la Banka Evropea para el desvelopamyento”.
El es un “grande vizyonaryo” todo en kedando syempre un ombre de ponderasyon. En syertos de sus livros el ekstrapola a partir de “un pedaso de realidad byen konkreta” para desinar muevas probabilidades en el espasyo ainda vazio del futuro.
De nasyonalidad Franseza, desendyente de una famiya de “hahamim” orijinarya del Norte de la Afrika, Jacques Attali es oy en dia un djudyo ke asume su djudeisita kon amor, sin nunka kaer en la ortodoksia ... El mos dize:
“....Eskoji de kedar djudyo, no por ke penso kel Djudaizmo es una relijyon de eksepsyon, ma por ke kreo ke kada persona es responsable de lo ke resivyo i ke eya deve transmeterlo afin de dar a las jenerasyones venideras una posibilidad de interesarsen a sus torno al Djudaizmo, i enfin porke lo ke topi en el me fasino, me izo refleshisar i me inspiro. Me plaze tambyen su manera de resivir las kritikas i de dubyar kontinualmente de si mizmo...”
Este livro mos pusha a pensar, a pezar kada palavra, a analizar kada argumento. En efekto, el Djudaizmo es un kestyonamyente kontinual, i kada una de muestras refleksyones son una eternal interrogasyon de mozotros a mozotros, una eternal diskusyon kon muestra konsensya komo tambyen kon el misteryo ande mos topamos.
El eskritor se refera munchas vezes a un otro grande pensador djudyo “Emanuel Levinas”, talmudisto i filozofo universalmente konosido del Venten siglo ansi ke a la sagasidad de munchos Rabbis ke disheron “No savemos deke egziste el universo, ma agora ke ya ay una koza, azeremos de manera ke se pase lo mejor posivle”.
Para Attali el kontakto kon Dyo pasa por el kontakto kon el ombre, por el respekto del otro, del ke no es djudyo... oirlo i entenderlo sin por esto pedrermos en el.
El repeta la ermoza rekomondasyon de Hillel “No agas al otro lo ke ne keres ke te agan”...
La introduksyon de esta ovra larga de 60 ojas kontyene a eya sola lo esensyal de su refleksyon sovre el djudaizmo, sus ezitasyones, sus dubyos i sus afirmasyones.
Es klaro ke no se trata de un diksyonaryo uzual ni en su kontenido ni en su prezentasyon... el autor mos dize “tomi la desizyon de avlar solo de los sujetos de los kualos so personalmente enamorado”.
En el se topa nombrozos paragrafos sovre varyos temas kel autor eskojo kon amor: “Aaron”, “Moise” , “Shabat”, “Shylock”, “Amos”, “Hillel el vyejo”, “Bethsabée”, “Kipur”, “Isaac Luria” , “Rachi”, “Nahman de Bratslav”...i mizmo envezes temas o personajes diametralmente oponentes los unos a los otros, komo “Nahmanides” i “Maimonide” ma ke Jacques Attali ama simultaneamente, ets... ets...
Es difisil de pueder transmeter en un chiko artikolo de 700 byervos el immenso potensyal intelektual i afektivo ke kontyene este lavoro. Se trata de un livro de kavesera ke kale tener debasho la mana i al kual kada uno se puede referar segun su menester o su dezeo.
Komo lo dishe en mi presedente artikolo . “ no se trata de erotizmo, ma del amor por un judaizmo avyerto, komunikativo i no enserrado en sus solas limites.?
Al pareser, Jacques Attali, todo en revindikando syempre su apartenensya al humanizmo de la “etika Hebraika ” kere (en la mezura ande esto es posivle) kedar lusido i adaptar el Judaizmo al konteksto de la epoka prezente.
El lucha por un Djudaizmo kreador de valores umanas, en mizmo tyempo fidel a si mizmo i tambyen respektuozo enverso los preseptos de los otros tanto ke eyos mizmos respektan sus dever de umanizmo i de universalizmo.
