Oy, estamos viendo un renasimiento de la vida i la kultura djudiya en este pais, ande anyos antes, la vida i la kultura djudiya estava floresiendo.
La mueva Sinagoga, el muzeo, i el sentro de la komunidad djudiya ke se establiso en Munih, en le mez de Marso, del anyo 2007, es un buen egzemplio de la reaparision de los sentros djudios, en Alemania.
En las sivdades Ulm, Potsdam, i Kolonia, muevos sentros djudios se vana establisar. En la sivdad de Erfurt, se ampeso tambien la renovasion de una Sinagoga ke data del anyo 1100.
Estos lugares estan protejados por la polisia, por modo del espanto de las atakas de los Neonazis.
Duspues del anyo 1945, solo 12 000 djudios kedaron en Alemania. Este shifro es el dos por sien de los 600 000 djudios ke biviyan en este pais, antes la Segunda Gerra Mondial.
El Prezidente del Konsejo Sentral de los djudios de Alemania, Charlotte Kobloch, es uno de los pokos sorviventes de la gerra. ‘Yo no teniya entision de tornar a Munih duspues de la gerra. Kije deshar este pais, porke no me puidiya imajinar ke los tiempos vana trokar’ esta dizyendo Knobloch.
Duspues de la gerra, unos kuantos otros sorviventes tornaron a Alemania. Ma, anyos i anyos, la komunidad djudia kedo muy chika. Los djudios biviyan solo en las sivdades komo Munih. Tanto ke, mezmo ke ya se saviya ke ay djudios bivyendo en Alemania, no saviyamos kuantos son, i ande biven.
Kuando el komunizmo kolapso (cokmek) en la Union Sovietika, duspues del anyo 1989, Alemania avyo sus puertas a los djudios rusos. 190 000 emigrantes djudios vinyeron a Alemania, entre los anyos 1989-2005. Mas de 80.000 djudios se entegraron en las komunidades djudias. Oy, egziste 106 000 djudios en este pais.
Kon esta emigrasion, ke izo ganar una grande vivasitad a las komunidades djudias de Alemania, la populasion del puevlo djudio de este pais, se konvertio en una de las rapid-kresyendo populasiones del mundo.
Los emigrantes orientales vinyeron kon sus kapasitades i edukasiones. Pokos de eyos, saviyan avlar el aleman. Kon tiempo, se ambezaron la lingua, la religion djudia, i los kostumbres djudios ke era enterdido de pratikar en el komunizmo.
Knobloch esta konvensida ke estos emigrantes se vana entegrar presto, ma eya esta dizyendo ke no kale ovligarlos a tener una identidad relijioza. ‘Si keremos reushir, kale ke eyos aksepten esta identidad mueva kon antuziazmo’ esta diziendo Knobloch.
‘Mezmo ke los djudios son una minoridad komo las otras minoridades de Alemania, no kale ke se olviden las solombras del Holokosto’ esta ajutando Knobloch. ‘Los djudios ke estan bivyendo en este pais, tienen un statu espesial, por modo de la istoria’
‘Este masakro ke se izo, va kedar en la memoria de las jenerasiones, porke los Nazis mataron los djudios, solo por ke son djudios’.
‘Ekos del pasado egziste dainda en las menasas de los Neonazis, ke afita de vezes en vezes en Alemania’.
‘Es una grande verguensa por Alemania, ke izo tantos eforsos para azer olvidar el pasado, si dainda, el aspekto de este pais en el etranjero es, ke los Neonazis un diya pueden ganar de muevo fuersa’.
‘Tenemos dainda problemas ke devemos rezolver. Por modo de la kriza ekonomika, tenemos de asigurarmos ke las bandas de los Neonazis no vengan a un estado ke no se puede reparar’.
Ma Knobloch mos esta rogando de no egzajerar la menaza de los Neonazis, en dizyendo ke, oy Alemania es un pais muy diferente de los 1930’s.
‘Somos una demokrasia solida. Weimer no peryo las eleksiones solo por modo de los Nazis, ma porke aviya muy pokos demokrates en el pais’.
Knobloch se esta kreendo ke la komunidad djudia de Alemania djuga un grande rolo en el pais. El grande sentro kultural djudio ke se establiso en Munih, es la mas grande prova, ke Hitler no gano.
