Una ermoza vijola el la sinagoga Neve Şalom
Alhad demanyana se selebro en la sinagoga Neveşalom, la vijola de la ija de Leyla i Rav Nafi Haleva ansi ke inyeta de Reyna (Rejin)-el Gran Rabbino İzak Haleva i Ester-Marsel İpekçioğlu.
Eya fue nombrada Reyna (Rejina) komo su avuela i por seguro traera a su Famiya, su Komunidad i su Payis “alegria”, “paz” i “armonia”. Venturoza i provechoza ke syempre eya sea.
La seremonia de Vijola fue grandioza, diskorsos yenos de sinyifikasyon, kantikas apropyadas de la parte del koro de ninyos i ninyas dirijido por İzzet Bana, la maraviyoza boz de muestro grande kantor David Sevi, la emosyon i la alegria de la asistansya muy nombroza i tambyen el bayle de las syete kandelas, vyeja tradisyon de Izmir.
El Dyo Baruhu ke la bendiga.
La entrevista de la Gazeta Sabah kon Silvyo Ovadya
Nombrozos de muestros korelijyonaryos i kompatriotos ekspresaron unanimamente sus satisfaksyon por la entrevista ke la gazeta Sabah organizo kon Silvyo Ovadya, Shefe de la Komunidad Djudia de Turkia, el kual manifesto su kontentez por las palavras de protestasyon, muy pozitivas en eyas mizmas, del primer Ministro Turko Tayip Erdoğan konsernando la kontestasyon de los partidos de la opozisyon de konfiar a una kompanyia Israelyana “la despajadura de las minas ke se topan en la frontyera Turka/ Siryana”.
Aksidente de avion, dolor immensa en syenes de korasones
La pedrita enriva del Oseano Atlantiko de un avion de la byen konosida kompanyia Air-France fue un golpe dolorozo para mozotros todos i tambyen un retorno del vyejo espanto delantre la immensita de los espasyos vazios.
Las bushkidas kontinuan ainda ma la esperansa desmengua gradualmente.
De loshos o de serka todos partisipamos a la sufriensa de los paryentes i amigos de los ke pedreron la vida en este terrivle aksidente.
