Alhad pasado el 7 del mez tuvo lugar la seremoniya de fin de anyo de los elevos de las klasas maternel de Ulus. El oditoryum estava yeno a parladar. Desparte las madres i los padres, los nonos, las tantes i onkles de las kreaturikas estavan prezentes. Los ermanikos mas chikos en el braso o durmyendo en las pusetes. Kameras, makinas de fotografiya, telefones dijital estavan travando fotos. Mizmo en el kat de ariva en el balkon no aviya lugar de asentar. En el kat de la entradura los ke no topron siya estavan asentados en basho. No se kere dicho la centorya ke estava dedetras en pies. En primero un koro de kreaturas anunsyo en kantando la seremoniya, i eskaparon en dizyendo “Are you ready!” (estash prontos para mirar). Komo los geos de los oteles de vakansiyas.
Los “Minix” izyeron un sirko; pasaron a dos ados vistidos de diferentes animales. Los ijikos de 2 anyos de la eskola dospuez las klasas de 3 anyos. Entre eyos tanbien Arel mi inyeto. Las ijikas balerinas vistidas de kolorado. Los ijijos en forma de papiyon. Reushimos a entrar al kulis i travar fotos kon el inyeto ma vinyeron las profesoras kon razon rogandomos de salir. Devo de konfesar ke Arel en primero no keriya meter los kalsados de balerina porke disho esto son kalsados de ijikas. Las klasas de 4 i 5 anyos tanbien pasaron a sus tornos mas konsyentes de los chikos.
Todo estava maz de ermozo; kaliya ver el orgolyo de los paryentes i de los nonos.
A la fin vino a shena un grande gato de chocolat akompanyado de luzes i maytap. Todos estavan envitados a la huerta para gostar i bever limonatas.Kon la allegriya la cente no estava konsintyendo el sol fuerte i la kalor.
