|
En un artikolo ke meldi, el eskritor esta bushkando la repuesta a la kestion: ‘Kualo es el sekreto detras la unidad del puevlo judio?’ En una asamblea ke reprezantantes de munchas komunidades judias asistieron, el eskridor remarko ke todos eran muy diferentes de unos a los otros. Ombres vistidos kon ropas tradisionales ultra ortodoksos, mujeres modernas en vistimientas luksozas i talones altos, ekstrem liberales, mansevos profesioneles en sus ventes, retirados en sus sesentas. Komo pueden estas personas tanto diferentes komo forma de vida, anyos, i opiniones , unirsen en una sola boz en el mundo entero, ‘la boz de los judios’? La istoria de los judios empeso kon las dodje tribes muy diferentes ke desharon Ejipto, i formaron una aliansa kon el Dio en el monte Sinai/ La tradision de los judios siempre fue la tradision de un solo Dio, mezmo ke uvo diverses opiniones sovre lo ke este Dio kijo dizir. La unidad judia es bazada en la lejitimidad (kanuna uygunluk) de diskusiones, i de diferensias ke es la fondasion de muestro puevlo: muestra kapasidad de estar dakordo, o de pueder eksplikar al otro ande no esta dakordo. El eskritor esta kontando una istoria en su artikolo. Un rey ke biviya en armonia kon los abitantes lokales judios, fue konvensido por uno de sus konsejeros ke le disho ke, en un emperio no deve de aver diferensias entre la djente. I ansi, este konsejero lo konvensio al rey de forsar a los judios de konvertirsen a la relijion del estado. Un diya, un fabrikante de tapetes le trusho dos tapetes al rey i le disho de eskojer el ke le va plazer. El primer tapet era de kolor kolorada i kon muy ermozas figures enriva; uno de los mas ermozos tapetes ke el rey aviya visto fin akel diya. El rey fue empresionado de esta ovra ma su kuriozidad por ver el otro tapet fue mas grande. El sigundo tapet estava brodado kon kolores diferntes, kon diversas figuras delikadas, i kon munchos detalyos. Los ilos utilizados eran de oro, de plata i de kovre. Verdadmente estava komo una ovra de arte, empresionante en su ermozura, i klaramente muncho mas ermozo del primer tapet. Furiozo el rey le disho; ‘Ya savias ke iva eskojer el sigundo tapet. Deke me ensultates en amostrandome los dos?’ El vendedor le responsio; ‘Sinyor Rey, el sigundo tapet es su reynado riko de diversidad, i de kapasidad. El primer tapet es lo ke su reynado va ser si oye las palavras de su konsejero. Todo lo ke es especial, todo lo ke es diferente, todo lo ke lo aze uniko a su estado, va dispareser’. Al diya el rey anulo la desizion ke el konsejero le aviya rekomendado. La ermozura del puevlo judio es komo este tapet. En este tapet, los ilos de diferentes kolores, i de diferentes matieras se ataron unos kon los otros, i una ovra de arte salyo en medio. La kapasidad de reunir los miembros de las komunidades judias del mundo entero, mezmo siendo tanto diferentes, pueder partisipar en un dialogo sin violensia; esto es la ermozura de la unidad judia. Viendo los konnfliktos entre los shiis i los sunniis, entre el Fatah i Hamas ke son ermanos, puedemos entender komo de presiozo es el dialogo entre los judios. Muestra tradision de dialogo, i de diskusion es muy puederoza. Esta unidad ke mos viene de muestra diversidad, es muestro orgolio. Muestra abilidad de ser respektiozos unos a los otros, es la baz de muestra tradision, i de la edukasion judia. Esto es el sekreto detras la unidad del puevlo judio. |
