Ay en kada vida, a un syerto momento, La posivilidad de no retornar a la tyerra las manos vazias i la konsensya amarga
El artikolo de la semana pasada de Ivo Molinos, direktor del konsilyo de administrasyon del ŞALOM, muy interesante i bastante profundo en su kontenido, mos izo muncho pensar, i (supozo) remeneo en munchos de los lektores “refleksyones” i puede ser “sentimyentos” guadrados en un kanton silensyozo de sus subkonsensya.
Despues de aver meldado este artikolo, mos topimos komo syempre delantre la mizma anksyedad egzistensyal el mizmo kestyonamyento i la mizma bushkida de un apoyo en el espasyo misteryozo de un mundo indeshifravle, del kual no konosemos ni el orijen ni la razon de ser.
El espanto de la muerte perpetualmente eskondido en un repligo de la vida komo una prezensya invizivle ma obsedante, mos persige ande ke vayamo, kualo ke agamos.
Syempre desde los tyempos primitivos el mizmo dubyo, la mizma pregunto, el mizmo esforso de no partir las manos vazias sin deshar detras de mozotros un sinyo ke va testigar de muestro pasaje.
La muerte es una fatalidad ineluktavle, ma kara a kara kon eya, ay “la vida”, este chiko o grande pedaso de tyempo ke mos es atribuido, i del kual semos responsavles , ay “todo lo ke puedemos azer”, “todo lo ke puedemos dar”, sola posibilidad de perpetuidad para mozotros kriansas mortales.
Ay komo dize Emanuel Levinas “la kara del otro” ...todo lo ke le devemos, sin nada asperar de eya... ay la posibilidad de komunikar i de transmetar.
En la vida, ay munchas vezes la libertad de pueder dezir ”Si” o “No” a syertos faktos, de akseptar o refuzar tal kamino, de luchar por o kontra kualker koza.
Ay enfin el lavoro, kual ke sea, intelektual o manual, a kumplir kon muestras manos o muestro esprito.
Aunke los diksyonaryos mos dizen ke la etimolojia latina de “travaho” es “tripalium” lo ke sinyifika instrumento de tortura, el es el mas grande dono ke el Dyo Baruhu izo al Ombre. Para kada persona, el kontyene la glorya de asumir su responsabilidad de “ser pensante”.
Lavorar sinyifika grandor de partisipar, de kolavorar, i envezes mizmo de krear... kuala ke seya su natura, el lavoro realsa el ombre i afirma su prezensya.
