Este teksto es el suplemento del dosye miyo de “El Amaneser” No. 57. En una manera es la kontinuasyon del artikolo “Djudios en el Palasyo Otomano”.
Salomon Aben Yaesh nasyo en 1520 en el Portugal komo Konverso, kon el nombre Alvaro Mendes. Gano la estima i konfiensa de Joao III, Rey de Portugal i fue nominado “Shovalye”. En toda okazyon i en kada lugar defendyo los enteresos del Portugal kontra la Espanya. Probavlemente seriya tambien kon este eskopo ke vino a la Turkiya ande biviya Joseph Nasi, miembro de su mishpaha.
Alvaro Mendes bivyo en diversos paises de la Evropa i tuvo relasyones estrechas kon los soverenos del Oeste. Entre otros puedemos sitar Elizabeth I Reyna de Ingleterra i Henri III Rey de Fransiya. La fortuna de Alvaro Mendes, su titolo de novleza adjustandosen a su profunda konosensya diplomatika, lo izyeron una figura muy importante en la Evropa del 16. Siglo. De sorte ke kada uno de sus aktos era segido kon entereso i atansyon.
Alvaro Mendes bivyo en la Evropa asta la edad de 65 anyos. En 1585 antes de emigrar a Estambol, un syerto tyempo estuvo en Salonika. Djuntos kon su famiya se konvertyo de muevo al Judaismo i tomo el nombre de Salomon Aben Yaesh. El Oeste todo en konosyendolo kon este muevo nombre, el enturaje diplomatiko kontinuo a yamarlo komo antes, Alvaro Mendes.
Akeya epoka la Ingleterra i la Espanya estavan en una konkorrensya kontinuala para ser el “Super Poder” de la Evropa. Efektivamente Elizabeth no kedo de ayudar la Ollanda kontra la Espanya. Por siguro en esta lucha de poder entre Ingleterra i Espanya, la pozisyon del Otomano podriya ser muy importante i desiziva. Aben Yaesh fue probavlemente uno de los ralos diplomatos evropeos a analizar este pleto diremos, entre los dos Estados poderozos de la Evropa. Yaesh fue tambien kapache de preveer i kalkolar las konsekuensas de la konkorrensya...
Entonses, Aben Yaesh empleo toda su kapachidad diplomatika para estableser una unyon Anglo-Otomana en desfavor de la Espanya. Su profundo odyo kontra este pais fue komo un “estimulante” en sus esforsos por la realizasyon de su proyekto. En este buto, estuvo en kontakto kon el Palasyo Inglez. La Reyna Elizabeth I, en el Marso de 1591 mando al Sultan Murat III una letra en lakuala estava deklarando su apoyo a los pasos diplomatikos de Yaesh. Sovre esto, i Aben Yaesh eskrivyo una letra de rengrasyamyento a Elizabeth.
Komo se esta vyendo, en los paises evropeos, El Imperyo Otomano no aviya reushido dayinda a estableser una “red” diplomatika efikache kon su propyo personel. Myentres ke los djudios teniyan relasyones seya komersyal, seya familyal kon los paises del Oeste. Komo konsekuensa, un shifro importante de djudios fueron ansi de grande ayudo i efikachidad en la diplomasiya Otomana.
Mozotros en el dosye de este mez estudyimos solamente unos kuantos nombres del 16. Siglo. Nombres komo Joseph Nasi, Salamon Ben Natan Eskenazi, Salomon Aben Yaesh i Esperanza Malki (Ester Kira). En el korso de los anyos naturalmente ke uvo diversos djudios en el Palasyo Otomano. No kedaremos en el kuadro estrecho de la diplomasiya. Devemos konsiderar tambien el Arte, Muzika, Literatura, Kultura, Medikeriya i mizmo el sektor de Finansa. Uvo muy famozos djudios en estos domenos ke mensyoni i puede ser en otros... Un ancho artikolo sovre eyos todos, seriya un proyekto reelmente enteresante...
P-S-En este teksto sovre Aben Yaesh me aprovechi en parte, de syertos pasajes
