|
Vengo de resivir un e-Mail de muestro grande amigo el Prof. Haim Vidal Sephiha ke me mando el teksto del raporto “Anti-Goldstone” de Richard Kemp, anteryor Komandante de las Fuersas Britanikas en Afghanistan. Me apresuri de traduzirlo en Djudeo-Espanyol afin de transmeterlo a muestros lektores. TRADUKSYON DEL TEKSTO DEL RAPORTO DE RİCHARD KEMP: “Sinyor Prezidente, Yo so el vyejo komandante de las Fuersas Britanikas en Afghanistan, servi en las Fuersas de la OTAN i de las Nasyones Unidas. Tambyen egzersi komandamyentos militaryos en la Irlanda del Norte, en Bosnia ansi ke en Makedonya i partisipi a la gerra del Golfo. Pasi un largo tyempo en Irak despues la invazyon de 2003 i partisipi a la lucha internasyonal kontra el terrorizmo por el kuento del Komite de İnformasyon del Governo Inglez Sovre baza de mis konosensyas i de mi eksperyensa, puedo dezir lo sigyente: En el korso de la Operasyon “Rio de Plomo”, la Armada de Defensa de Israel izo muncho mas ke kualkyer otra armada en la Historya , para salvaguadrar los derechos de siviles ke se topan en zona de kombate. Israel lo izo, alora ke afrontava un enemigo ke metia voluntaryamente sus fuersas militaryas detras el eskudo humano kompuesto de la populasyon sivil. El Hamas komo el Hesbollah son ekspertos en el arte de diktar a los gazeteros lo ke diran. El uno komo el otro tyenen syempre personas prontas a akulpar los soldados Israelyanos de krimens de gerra. Eyos son ekselentes para meter en shena i desformar insidentes. La Aramada de Defensa Israelyana es konfrontada a un desfio al kual los Britanikos no tuvyeron nunka a enkontrar, Se trata de un prejuisyo otomatiko de diferentes gazetas i postos de televizyon, ansi ke de numerozas “Organizasyones de los Derechos del Ombre”, segun los kualos los soldados de la Armada de la Defensa de Israel son syempre kulpavles. La verdad es ke la Armada de Israel izo todo lo ke es posivle para sinyalar a los siviles de Gaza “los lugares ke ivan ser bombardados”, en echando prealablemente dos milyones de “avizos” i en establesyendo mas de 100.000 komunikasyones telefonikas. Tambyen munchas misyones ke puedian neutralizar la kapasidad militarya del Hamas fueron anuladas afin de impedir pedritas siviles. Durante el konflikto, la armada Israelyana permetyo el arrivo en Gaza de enormes kuantidades de ayudo humanitaryo. Abasteser un ayudo suseptivle de kayer en manos enemigas es normalmente impensavle para un eksperto en stratejia militarya, portanto la armada Israelyana tomo este risko. Malgrado esto, siviles inosentes fueron matados. La gerra es “chaos i errores”. Errores fueron tambyen echas de la parte de inglezes, Amerikanos i otras armadas, en Afghanistan i Irak. Munchas pueden ser atribuidas a faktores humanos. Las errores no son krimens de gerra. Mas ke kuala otra koza, las pedritas siviles (en Gaza) fueron la konsekuensa de la manera de kombatir del Hamas. El Hamas kijo voluntaryamente sakrifikar siviles. Sinyor Prezidente, Israel tenia el ovligo de defender su populasyon i de impedir el Hamas de atakarla kon tiros de roketas. Lo repeto, la Armada de defensa de Israel izo mas ke kualkyer otra armada, afin de salvar los derechos de siviles en zona de gerra.” ? Grasyas Sinyor Prezidente |
