|
Kada anyo, el 9 de Noviembre aze akodrar a los almanes, dos evenemientos de la istoria,. Este dia es el ‘Dia de alegriya’ i el ‘mas triste dia’ por los almanes. En el 9 Noviembre 1938, sinagogas fueron kemadas en el pogrom de Kristallnacht. En la mezma data, 20 anyos atras de oy, la Pared de Berlin fue derrokada. Este dia es el ‘Dia del Destino’ por el pais. En estos dias, Berlin esta fiestando la unifikasion de las dos Almanias. Konsiertos delantre la Puerta de Branderburgo, ekspozisiones en toda la sivdad, konferensias i programas en la televizion, son unas kuantas de estas aktividades. Ma, kada anyo, la komemorasion de Kristallnacht asombra las selebrasiones. Kristallnacht es mensionado en los deskorsos, i en los sermones en la media. Este anyo, el periodiko judio de Almania ‘Jeudishe Allgmeneine’ eskrivio en la primera pajina ke en medio de esta alegriya, no kale olvidar los pogromes de 1938.En una deklarasion ofisial, Charlotte Knobloch, el prezidente de Konsey de los Judios, disho ke, este anyo, las selebrasiones izieron un poko olvidar el rekuedro de Kristallnacht. ‘Oy aze 71 anyos del chapitro el mas obskuro de la istoria almana. Kristallnacht fue un masakro sistematiko ke mos aze averguensar. Este evenemiento tambien no deve de ser olvidado. El 9 Noviembre mos aze akodrar ke la libertad es una koza ke kale gerreyar por obtenirla, i por defenderla’ disho Merkel, en su deskorso de este anyo. Es verdad ke Almania troko muncho. Oy, el pais es dirijado por una mujer de Almania Oriental, i es reprezantado en el etranjero por un ministro ‘gay’. Almania, oy, es un pais riko, i djuga muy grande rolo en las desiziones de la Union Evropeena. La komunidad judia de Almania tambien troko muncho. Kon 220.000 miembros, oy se izo la mas grande komunidad de Evropa. En el anyo 1989, munchos judios emigraron de la Russia. Komo rezultado, muevas komunidades se establiseron, i muevas Sinagogas fueron konstruidas. İ ansi, el numero de los rabinos se izo triplo. Dos eskolas rabinikas fueron establisadas tambien. Antes ke los emigrantes vinieran, la majorita de los judios de Almania eran sorviventes del Holokosto, i refujiados. Munchos de eyos no estavan siguro si ivan a kedar en Almania. No tenian rabinos en la komunidad, i por esta razon, no puedian tener una vida relijioza. Duspues de la emigrasion, muevas komunidades fueron formadas. Munchos rabinos fueron emportados de İsrael, ma i munchos fueron edukados en Almania. Los judios almanes estan aziendo grande esfuesos para pueder alkansar la juderia almana de anyos antes. El establisimiento de una universitad judia, kon munchos elevos judios i non-judios, es el empesijo de estos esfuersos. Mezmo ke paso vente anyos de la unifikasion de los almanes, no se puede dizir ke la djente del este i del ueste se entegraron kompletamente. Se puede dizir la mezma koza mezmo por los judios. El rezultado de sesenta anyos de opresion, i de ateizmo dianda teine una trasa. Los emigrantes judios dainda se sienten alienados de la identidad judia. Munchos almanes del este tambien no estan muy kontente. Los almanes del ueste tienen mas atlas gananias i mijor echos. Ma, i las dos partes son kontra el rasizmo i el antisemitizmo. Este anyo, puede ser ke, la alegriya fue mas grande ke la tristeza, ma el mesaje de la demokrasia fue el mezmo. Esto no signifika ke 1938 fue olvidado. Esto es emposivle. Kada elevo esta en koryente de este chapitro de verguensa de la istoria almana. |
