Ay dos semanas, el Prezidente de la Republika Franseza “Nicholas Sarkozy” demando a los ijos de Albert Camus, muerto en 1960 a la sigida de un aksidente de otomobil, la otorizasyon de desterrar i transferar los restos de sus padre al Pantheon, lugar prestijyozo ande se topan enterrados los mas grandes Personajes de la Historya de Fransya.
Aunke nada justifika espesyalmente el fakto de avlar de este kavzo en muestra gazeta hebdomadarya, me permeto de azerlo, visto la alta valor del grande humanisto ke fue i es Camus.
Sin nunka ser didaktiko ni profesoral, leshos de kualkyer sistema filozofiko formulado kon grandilokuensa, el fue un djenero de giador intelektual i moral, para munchos mansevos ke se topavan en un estado de terrivle desmamparo despues de la segunda gerra mundyal i partikularmente del karnaje inhumano de la Shoa, periodo del kual la humanidad avia salido no solo ferida en sus karnes ma sovre todo en su dinyidad.
Albert Camus aparesyo entonses komo “una konsyensya lusida” leshos de kualkyer utopia o ideolojia eksesiva.
Todo en syendo syempre konvensido de la absurdidad del mundo, el amava la vida, el era kontraryo a todo modo de terror, todo modo de violensa i de totalitarizmo.
Uno de los primeres livros ke lo izyeron konoser fue ‘’l’etranger’’, el kual (en su sujeto komo tambyen en la evolusyon de su aksyon) formula la absurdidad del destino humano sin portanto nunka pensar meter fin a su egzistensya.
Personaje anonimo en la multitud popular, sin nada de partikular ke lo desferensyava de los otros, sin ninguna predispozisyon para perpetrar kualkyer akto negativo, ni intensyon o motivo prealavle, el personaje sentral “Meursault” mato un ombre por la simple razon ke se topava a un syerto momento en un syerto lugar i ke por azardo yevava sovre el una arma ke apartenia a un amigo del kual, el, ”Meursault” la avia konfiskada de espanto ke este amigo ( ke se topava en un grande estado de nyervozidad) aga un akto irrevokavle…
Este akto ke el kijo absolutamente evitar, el mizmo, sin razon espesyal, lo perpetro en un reflekso de espanto. El drama se pasava en la Aljeria de antes la gerra de Liberasyon, en una situasyon de total inkoerensya sosyal. Uvo byen entendido procheso, kondenasyon i sentensya de muerte.
Komo lo vemos, el tema prinsipal del livro es enteramente konsakrado a la afirmasyon de la absurdidad de la vida, por kontra en su livro ‘’La Peste’’, Camus todo en mentenyendo syempre el mizmo tema, introduze un muevo elemente “la revolta” i kon eya la lucha kontra esta mizma absurdidad.
‘’La Peste” (veba) es la historya de una sivdad debasho la terror del ‘’terrivle mal’’ ke aislava enteramente la populasyon del resto de la humanidad… situasyon inegzoravle, sin puerta de salida… ombres i mujeres fatalmente kondenados a murir … ma entre eyos un ombre maraviyozo “el doktor Rieux” el kual, aunke konsyente de la sertitud de la muerte, empeso a luchar (kon el ayudo de unos kuantos amigos) kontra la fatalidad.
Endjunto kon la revolta,vemos ansi espuntar un segundo tema opozado al absurdo ‘’la solidaridad humana’’ elemento ke puede salvar en kada persona su dinyidad de ‘’kriansa pensante’’.
Camus komo Sartre (su amigo por un syerto tyempo) mantuvo syempre el tema de la absurdidad de la vida, i tambyen la teoria egzistensyalista, ma a la grande diferensya ke su egzistensyalizmo no fue nunka nihilisto ma humanitaryo.
En su livro “l’homme révolté” el disho lo sigyente: “eskoji la djustisya afin de kedar fidel a la Tyerra. Kreyo syempre ke este mundo no tyene una sinyifikasyon superyor, ma tengo la konviksyon ke una koza en el tyene una sinyifikasyon i es el Ombre porke el es el solo ke egzije de tener un senso.”
Mucho mas ke un filozofo, Albert Camus fue un pensador, un ombre ke konosyo la mizerya durant toda su chikes, dia despues de dia. Guarfano, engrandesido por una madre ke no savia ni meldar ni eskrivir i ke devia lavorar en kazas ajenas para mantener sus ijos, el tuvo la immensa shans de aver sido remarkado por un maestro de klasa perspikaz ke izo su posivle para azerlo entrar en un grande liseo de Aljeria. İ al kual Camus dediko su Premyo Nobel en sinyo de gratitud. Su karrera eskolarya fue briyante, ma no pudo ir muy leshos en sus estudyos universitaryos, impedido por la tuberkuloza ke ravajava sus pulmones.
Kuando su estado de salud se mejoreo, el fue a Paris, ande fue kaji immedyatamente distingido por su briyante talente de eskritor, lo ke le permetyo de azer parte de uno de los mas selektos grupos intelektuales de la epoka. Jean Paul Sartre fue su amigo intimo, ma una diferensya de ideolojia los despartyo por syempre.
Kuando, komunisto fervente, Camus fue vijitar la Rusia, desde ke se rendyo kuento del totalitarizmo del sistema bolsheviko i de la horrivle represyon egzersada kontra los intelektuales oppozantes, el immedyatamente se revolto i se retrakto...Para el ninguna ideolojia justifikava la muerte o la represyon de inosentes por la sola razon ke eyos pensavan de una manera diferente.
