Meldatesh una dicha ke me plaze. Ma ke pekado, de diya en diya estamos mas ralamente riendo o azyendo lores. Ke mos esta afitando? Estamos en un reselo kolektivo... reselo de parnasa achakes la kriza ekonomika i sus konsekuensas, de la kareza de vida. Mos se adjusto i el reselo grande de salud. Komo todos mos estamos espantando de esta “Espada de Damokles” ensima muestra kavesa...
No devemos ser esklavos de este espanto ke vino al grado de panik i ke no mos ayuda en nada. A la kontra, devemos dar otra reaksyon, mas pozitiva, mas konstruktiva. Komo?... Antes de todo, no ser pesimistos, no pensar syempre a una katastrofa, ma tomar todas las prekosyones menesterozas. Naturalmente no kero dizir ke no ay perikolo o minimizarlo. Porke esto es una realidad, un fakto. Ma esta realidad no deve influensar muetra vida de kada diya al grado de gastar muestra salud moral. Es verdad ke trokimos syertas uzansas, tomimos muevas i mos estamos adaptando mas demaziya a syertas reglas de ijyen. Bueno, esto no es la fin del mundo!...
“Mirad kon esperansa al avenir i kon kerensya a vuestra syedra i derecha”. Egzaktamente komo penso yo. Syempre mirar a un avenir mas orozo, mas ermozo. No peryer la mas chika okazyon de riir, de sonreir. Ser atados uno al otro kon kerensya, kon amistad... Todos tenemos el derecho de konoser la felisidad, si mizmo la konsepsyon troka de edad en edad, de persona a persona.
Me akodro en mi chikez kuando nasyeron mis ermanikos diziya yo “ ke trezoro, ke felisidad es en la vida, tener ermanikos... Partajas kon eyos tu kerensya, los djugos i afilu tu “chokolata” !!.. Mis amigitas ke teniyan ermanas, me aziyan pizmas en adjustando: “ Mozotros mos partajamos i muestras vestimyentas!!”. En la chikes esto deviya ser muestra konsepsyon de felisidad. En todo kavzo no penso ke troko muncho. Porke los ermanos syempre kontinuan a partajar, mas i mas sus kerensya sin fin...
Agora viniremos a la sinyifikasyon del titolo de este teksto. Tengo meldado en una revista un artikolo de un doktor ke no me esto akodrando el nombre. Dizyendo ke los medikos eskriven reseftas, kuras i amostran kaminos para kedar sanos... Los ekonomistos, reseftas de amijorear la ekonomiya ets.. Ay i otros, kaji savyos ke dan reseftas de felisidad. İ en este artikolo aviya una lista de lo ke devemos posedar para ser orozos. Yo la guadri esta lista, esta resefta. Puedo dizir ke asemeja muncho a mi propia konsepsyon de la vida. Primera vez, la esto eskrivyendo en estas ojas... TENER:
-En la vida un buto ke vos da satisfaksyon.
-Un echo ke vos mantenga.
-Una rikeza bastante para vuestros menesteres bazikos.
-Un buen meoyo, kapache de balansar el lavoro i la distraksyon.
-Una kerensya para tomar plazer kon el derredor i kererlos byen.
-Un sentimyento de buendad para ayudar el menesterozo.
-Koraje para afrontar los problemas i solverlos.
-Un poko de buena umor para riir o sonreir a kada okazyon.
-Esperansa de pueder tener un buen futuro.
-Una salud permetyendo de bivir la vida kon todas sus valores.
-İ enfin, un fuerte sentimiento de agradesimiento, de “lores” al D. por esto todo ke posedas.
Keridos amigos, no se kualo en esta lista es vuestro favori. Para mi es el ultimo, porke “ Si tyenes razones de azer “LORES” a D., es ke ya deves konoser la felisidad”.
