Komo ya savesh este anyo fue el anyo ande se selebro la kultura Turka en la Fransya i munchas aktividades fueron organizadas por institusiones de los dos paises para azer konoser todos los aspektos de la kultura Turka. Es kon esta okazyon ke la institusion Cordoue Confluences en cooperasion kon la IKSV (La Fondasyon de Kultura i Arte de Estambol) i el Centre Fleg de Marsilya organizaron una serie de konsiertos en Marsilya i Paris.
El grupo Los Pasharos Sefaradis (Karen Şarhon, Izzet Bana, Selim Hubeş i Yavuz Hubeş) adelantre se fueron a Marsilya. El Centre Edmond Fleg es un sentro komunitaryo donde se azen munchas aktividades para la komunidad judia bien nombroza ke ay en Marsilya. Es ayi ke Los Pasharos dieron sus primer konsierto. Ay unos kuantos tiempos ke los konsiertos estan akompanyados por un powerpoint kon imajenes i informasiones sovre la kultura, lingua i muzika sefardi i tambien por las palavras de todas las kantikas ke se estan kantando. El publiko estuvo tresalido de esta parte visual del konsierto, espesialmente de ver las palavras de las kantikas en un ekran grande lo ke fue posivle para eyos de kantar endjuntos kon Los Pasharos.
El grupo tambien vijito una de las mueve eskolas judias ke ay en Marsilya i avlaron i kantaron kon los estudiantes ke se interesaron muncho en estas kantikas en una lingua muy paresida al Espanyol ke buen karar de eyos konosiyan.
El konsierto en Paris fue en el “Musée d’Art et d’Histoire du Judaisme”, un muze grande i maraviyozo kon un auditorium muy profesional. Munchos amigos del mundo sefaradi vinieron al konsierto tambien kon representantes diplomatikos de la Turkiya komo el Sr. Gürcan Türkoğlu, ambasador permanente de la Turkiya del UNESCO.
Mas detalyos sovre la eksperiensia de Los Pasharos Sefaradis en la Fransya toparash en El Amaneser sigiente.
Karen Gerson Şarhon
