La semana pasada tuve la okazyon de segir en una emisyon de la televizyon ajena, la diskusyon de dos ombres politikos de opinyones diferentes sovre un mizmo insidente relativamente banal .
Aunke todos los dos interlokutores eran de alto nivel intelektual , se sentia entre eyos komo un menester imperyozo, kaji salvaje, de salir absolutamente ganador del debate.
No se tratava mas de una simple analizis del fakto sovre el kual eyos se topavan en estado de dikusyon, ma de un dezeo irreprimible de venser absolutamente el interlekutor ke se topava delantre... un djenero de voluntad de potensya o puede ser de simple orgolyo ke pusha munchas vezes la persona a ir lo mas leshos posivle.
En todo kavzo, no paresia ser un uzual kambyo de ideas entre dos testigos de un mezmo fakto, ni una bushkida sinsera de la sinyifikasyon de una kualkyer situasyon, ma solamente un djenero de fanatizmo, una fokalizasyon de kada uno en su sola interpretasyon, sodro a lo ke el otro dezia. Uvo mizmo momentos ande paresia aver komo una ruptura del dialogo entre eyos, en favor de dos monologos.
Por segura avra elementos pozitivos en kada uno de los argumentos prezentados por kada uno de los partisipantes. En la vida koryente ay inkontestavlemente una syerta valor en la ardor kon la kuala kada uno defende su punto de vista , ma para ke la diskusyon sea realmente provechoza, es imperativo de akseptar de renovar onestamente su opinyon, kada vez ke la situasyon lo demanda, a la luz de lo ke el otro dize.
Un dialogo no es una pelea ni puede ser limitado a una vulgar ekspozisyon de lo ke parese ser la verdad, sin azer el meno esforso afin de entender lo kel otro kere dezir
Una vyeja palavra de la sagasidad antigua dize “la verdad se topa en medyo” i mizmo (puedemos afirmar en syertos kavzos) entre dos afirmasyones kontraryas, al pareser diametralmente opozadas la una a la otra... a la sola kondisyon de tener el sinsero dezeo de ayegar a un konsensus komun.
Eskojer lo ke ay de valido en kada argumento, adjuntar i adjustar para konstruir en mirando de no destruir.
