Keridos Korelijionarios
İ este anyo alkansimos kon todos djustos, sanedad i prosperidad a la fiesta de “Pesah” ke apregona la primavera todo en agradesiendo a el Altisimo Dyo ke nos ayego a estos diyas.
“Baruh Şeehiyanu Vekiyemanu Veigianu Lazeman Aze”
Komo ya lo savemos “Pesah” no solo ke es el kumpleanyo de la salidura de nuestros abuelos del la esklavitud en Ayifto, sino ke semboliza la libertad fizika komo la esprituala seya de las djenerasyonas pasadas i seya de nuestra djenerasyon.
Es por esto ke “Pesah” logro de ser el sentro de la fe judia tomando su fuersa de esta libertad.
Referiendomos de este punto de vista “Pesah” ke la yamamos en otro termino “Hag Haaviv/Fiesta de la Primavera” no reprezenta solo un periodo dentro nuestro kalandario, sino ke okupa una emportansia de ser la primavera de lo ijos de İsrael por akordarsen a los preseptos divinos. Basta ke sinteremos esta primavera en nuestro esprito i la transmeteremos a nuestros ijos komo se deve.
“Veigadta Levinha Bayom Hau / İ Se Lo Kontaras a Tu İjo En El Diya Propio”
El “Pranso de Seder” ke mos aunamos alrededor kon todos nuestros keridos i serkanos i la “Agada de Pesah” ke resitamos komo lo uzamos kada anyo, nos prezenta la oportunidad adekuada para kompletar esta misyon.
No dubyo ke nuestros korelijionarios profitaran de esta oportunidad.
Keridos Ermanos
Komo una buena kasualidad esta anyo la fiesta de “Pesah” koensido en los diyas del empesijo ala fonksion del Konsejo de nuestro rabinato ke se renuevo su una emportante partida i de el nuevo prezidente de nuestra komunidad.
Profito de esta koensidensya para augurarles al prezidente i a los konsejeros una buena reushidad i sukseseo en sus lavoros ke en verdad nesesitan munchos esforsos i sakrifisios todo en konfirmando mi konfiensa en eyos i vos envito de aunarvos kon eyos por kolaborar kon todo vuestro ardor afin de annalteser nuestra kolektividad en todo modo de senso.
En este punto tengo de rengrasiar i agradeser a nuestros prezidentes i konsejeros veteranos ke tomaron parte en los lavoros komunales para alkansarnos a esta situasion i ke oy se topan entre nozotros todo en mansionandolos kon profundo agradesimiento a los ke ya no estan oy en vida.
“Yeşalem A. Paolam / El Dyo Premiara Sus Ovras”
Keridos Korelijionarios
Bien savido ke la fiesta de “Pesah” deve fiestarse konforme a los preseptos de nuestra ley i a las tradisiones de nuestra kolektividad. Es kon esta kondision ke pedemos estar firmes en todos los tiempos i puedemos provar nuestra unidad i ermandad.
Siendo bien siguro ke kada uno de nozotros no vamos mankar de mostrar el kudyo menesterozo, vos felisito kon toda mi sinseridad i vos auguro un pesah yeno de alegria, sanedad i prosperidad todo en bendiziendovos kon un kalorozo Moadim Lesimha.
Hag Pesah Sameah
Gran Rabino
