En muestra epoka ande mos parese ke la teknolojia alkanso a su punto el mas alto, ande el ombre pretende aver konkistado el espasyo, ande la matematika parvyene a rezolver problemas asta agora sin solusyon konkreta, ande sovre todo, en los laboratoryos, los syentifikos se esforsan de krear kriansas humanas... en muestra epoka de mundyalizasyon ande las fruntyeras paresen alargarsen asta el infinito, el kapricho de un simple volkan enklavo sovre tyerra miles de avyones i ansi paralizo milyones de personas, undyendolas en la immobilidad.
Evento, grasyas al Dyo, pasajero ma ke mos ambeza ke nada es seguro ni nada estable . Ke seran las konsekuensas? Raros son los ke puedran realamente responder.
