La Primavera esta azyendose sentir kon el sol amostrando su kara riente. En vezes esta eskondido detras las nuves, ma, ansi ke ansi es Avril i Estambol mos esta arregalando kon su Natura sin igual. Basta un torno de vaporiko en el Bosfor para bivir esta egzaltasyon. Puede azer un poko fresko, o puede aver luvya amanyana. Ke importa?... Porke ya savemos ke en la mueva sezon enfloresen i las muevas esperansas. Es la sezon de las flores. La Natura entera se transforma en un imenso floristo ke no tura muncho, kale profitar.
Para unos, la Primavera viene kon las margaritas en los kampos, en las kolinas. Blankas, amariyas, son simples ma dan keyf en simbolizando el espertar de la Natura. Mas arrekayentando, ampesamos a ver las olas de pasharos migrantes (göçmen) en el sielo klaro de muestra sivdad. Estambol se topa en el kruazamiento del itineraryo de migrasyon. Para los amatores, es un plazer de ver los pasharos tornando, via Estambol, a la Russiya o la Evropa, en uına dishiplina de armada.
Al pareser, en desparte de lo ke mensyoni mas arriva, para syertos ay otros sinyos de la mueva sezon. Dizen en Estambol, sin ver los arvoles de “Erguvan”, kon sus chikas flores roz-lila, no se puede dizir ke ya vino la Primavera. No konosko el nombre en Judeo-Espanyol de esta planta. Ya se ke es konosida por los estranyeros komo “Judas Tree”, lo ke kere dizir “el arvole de Yehuda”. Egziste i una leyenda sovre la kolor de las flores del arvole. En desparte, fue la kolor “ofisyal” del Imperio Bizantino. De ande, ande?!!
Otruna flor de la Primavera es la tulipa (lale), uno de los simbolos de Estambol. Vemos en todas las partes de la sivdad, esta flor kon sus formas i kolores diversas. Es la flor ke dyo su nombre a una era, una epoka del Imperio Otomano, komo “Lale Devri”.
Antes unos, dos anyos tengo eskrito por las “Flores de Nishantash”. Despues me demandi:”deke solo Nishantash? .. no se. Las flores, maraviyas de la Natura, estan aryento de muestra vida, kon la armoniya de sus kolores, sus formas i parfumos. Las vemos en las vinyas, en los kampos ande kresen de si para si. Otras, kon muncho kudyo i amor se engrandesen en las seras i las guertas. Trandafilas, klavinas, tulipas, lilas, margaritas, violetas i otras... I, mizmo si es ralamente, vemos las nenufares (nilüfer) kreser, kon un poko de “regancho”(naz), ensima las aguas kalmas de un lago...
Ande keren ke se topen, admirar las flores en la vitrina de un floristo, en los kampos, al bodre de un kamino o en muestras kazas... Sin bruido, silensyozas partisipan a muestra vida, mos akompanyan, mos dan plazer... No miresh ke dishe silensiozas. Kada una tiene su sinyifikasyon, su lenguaje, su mesaje. Lady Montagu, una novle dama ingleza ke bivyo aki en el presipyo del 18. Siglo en las letras ke mandava a sus amigas de Ingleterra, eskriviya: “ Sin dingun esforso puedesh diskutir, malsinar, embiyar letras de amistad, de amor, de“savoir-vivre” afilu novelas kon las flores. Kada una eksprime su mesaje.. Aki me ambezi la lingua de las flores.”
En la mezura de mi espasyo, aki syertas flores i sus mesajes. “Trandafila” blanka: inosensya, korolada: amor, pasyon, roz: mi korason esta en ti i trandafila amariya: amistad kayente.... “Klavina” blanka: pureza, inosensya, roz: amistad leal, amariya: melankoliya... “Tulipa” amariya: stress, nyervozita... “Violeta”: modestiya, “Kamelya”: orgolyoza ets... Las flores tienen sus sinyifikasyon kon eyas propias i sus diferentes kolores.
Las flores syempre fueron los mesajeros de muestros sentimientos de kerensya, de amistad i siguro, de amor. Son tambien kompanyeras inseparavles de los poetas i tienen un lugar inkontestavle en el Arte.
