Alhad pasado el 25 avril, Gilles Bernheim Gran Rabbino de Fransa asistyo personalmente a la seremonia komemorativa organizada komo kada anyo en Vichy, en rekuerdo de la deportasyon de miles i miles de djudyos entregados a las otoridades nazis de la parte del governo del mareshal Petain, el kual todo en savyendo ke eyos ivan ser mandados a los kampos de la muerte,avia abokado la kavesa delantre los dekretos inhumanos de Hitler.
Esta prezensya del Shefe Espiritual del Djudaizmo en la kapitala del governo kolavorasyonisto, tyene una grande sinyifikasyon simbolika, espesyalmente porke desde la fin de la gerra 1939/1945 asta agora, este lugar no tyene nunka resivido la vijita de un kualkyer otro Grande Rabino de Fransa.
El fakto en kestyon no tyene por seguro ninguna relasyon kon muestra komunidad, ma esto no impide ke munchas kestyones mos vengan al esprito. “Deke un ombre de la dimensyon del Gran-Rabbino Bernheim, de una ortodoksia relijyoza absoluta, eskojo de komportarse de una manera diferente de sus predesesores?”
Komo lo afirman la mas parte de personas ke lo konosen de serka, el Gran-Rabbino Bernheim es un ombre simultaneamente muy estrikto en el kumplimyento de su misyon relijyoza, mizmo intransijente en la obedyensa total de los preseptos relijyozos del Djudaizmo i en mizmo tyempo muy avyerto al Eksteryor.
El es un ombre de refleksyon relijyoza i tambyen de dialago kon el otro, i esto tyene una importansa mayor
En su adolesensya, el estudyo simultaneamente: de una parte la sagasidad Ebraika, el Talmud i la Kabala, i de otra vanda: la filozofia profana de los pensadores gregos de la antiguidad komo tambyen de los del Siglo de las Luzes.
Alhad pasado, el kijo meter fin a una kualkyer amalgama entre “un akto inyominozo” i “una sivdad de Fransa” ande ainda moran sitizanos de konfesyon djudia i sovre todo numerozos “djustos entre los djustos” ke se avian esforsado de salvar lo mas posivle de muestros ermanos en peligro.
En el diskorso ke prununsyo, el disho: “Este dia de rekuerdo de la deportasyon es la okazyon de akodrarmos lo ke se paso durante el rejimen de Petain, ande un kuarto de los Djudyos Fransezes fueron arrestados, denunsyados i deportados, ma no devemos olvidarmos ke los tres kuartos de muestra komunidad pudo sovrebivir grasyas al ayudo de famiyas kristyanas . no devemos olvidarmos la fraternidad i el eroizmo de todos estos fransezes”.
El Gran-rabbino Gilles Bernheim es por seguro un ombre superyor, syempre en la bushkida de un interkambyo de ideas mizmo kon personas de relijyon diferente,,,el es partizano de estos debates ande kada partisipante, todo en guadrando estriktamente sus propyas konviksyones relijyozas, se ambeza a mijor konoser i sovre todo mijor entender ”el otro”. El kolavoro mizmo kon un Prelato Kristyano en la redaksyon de un livro komun ande kada uno ekspreso sus ideas i prezento sus argumentos.
El inkarna ansi la personalidad del verdadero Shefe relijyozo, infleksivle en su fey i en mizmo tyempo, la kara tornada verso el Futuro, pronto a ir verso la luz i engajarse en un akto de vida ke solo puede dar realmente un senso a la kondisyon humana...
No mos olvidaremos ke, riko de una profunda kultura Ebraika i tambyen jeneral, el tyene una muy ancha persepsyon del mundo.
Alhad pasado,el supo sovrepasar la vyeja retisensya enverso una tyerra ke tuvo el triste suerte de servir de kapitala a un governo iniko, i de mezmo el parvino a venser su menospresyo por el okupante afin de markar su solidaridad kon la populasyon otoktona...
Uvo en este akto de Gilles Bernheim lo ke es tan presyozo en la personalidad de un shefe espiritual: “una avyertura enverso el otro”.
