Uno de los mas importantes objetivos de una sentensya judisyal pronunsyada kontra el otor de un krimen, no es solamente la djusta punisyon de un akto reprehensivle ma sovre todo “un elemento edukativo i disuazivo”.
Lunes 13/7: Ay de esto aproksimativamente 3 anyos. “Ilan Halimi manseviko djudyo de 22 anyos, empyegago en una firma de telefonia, avia sido arrevatado por una banda de delinkuentes por la mas parte afrikanos, torturado mortalmente i echado despues de tres semas de terrivle sufriensa al bodre de un kamino dezyerto.
El drama avia provokado una grande emosyon al nivel kaji internasyonal. Al empesijo el kavzo fue konsiderado por el tribunal komo un akto krapulozo dirijido kontra una persona supozada ser de famiya rika. Ma, Ilan Halimi syendo de kondisyon ekonomika medyana, este motivo pyedro kaji immedyatamente su kredibilidad.
Se entendyo ansi ke (aparte las razones vizivles de simple delinkuensya) el motivo prinsipal de esta trajedia era el antisemitizmo, lo ke es un motivo agravante, partikularmente en el payis ande fue redaktada la Deklarasyon de los Derechos del Ombre.
La komunidad Djudia de Fransya ansi ke varyos intelektuales i ombres politikos sezudos defendyeron desde el primer minuto esta tezis i parvinyeron a azerla akseptar por las altas Instansyas Judisyales del payis.
Terrivlemente ferida durante la segunda gerra mundyal, en sus karnes komo en su dinyidad, una de las partikularidades de la aktual komunidad Djudia Franseza i mizmo puedemos dizir del puevlo djudyo en su mayoria es de ser perpetualmente en estado de absoluta vijilansya: “kontinual observasyon de lo ke se pasa en su entoırno, no deshar pasar el meno indisyo de aborresimyento ni el mas chiko danyo echo en desfavor de uno de sus myembros” ets..ets...
I kuando Vyernes pasado el 10/7, durante la ultima sesyon del procheso “Ilan Halimi”, el veridikto definitivo fue pronunsyado: “rekluzyon a vida para Fofana el shefe de la banda, 15 a 18 anyos a sus dos kompliches direktes i sanksyones relativamente minores a otros, kon para algunos de entre eyos, la sentensya en suspensyo” la madre de la viktima manifesto immedyatamente su deskontentez.
El Crift i otras asosyasyones Djudias se aunaron tambyen a eya i protestaron kon vehemensya en reklamando una revizyon publika del procheso.
Komo deshar sin penalidad adekuada personas ke mizmo si no partisiparon aktivamente al akto kriminal, permetyeron su egzekusyon en no prevenyendo ninguna otoridad del payiz? De edad mayor o minor, en el korason de kada myembro de esta banda (ke se nombro de eya para eya “banda de salvajes”) el mizmo odyo, la mizma repulsyon animal enverso el djudyo, la mizma komplisidad en la egzekusyon del krimen.
Es ke el procheso va ser revisto? Depende de munchos faktores.
Penso personalmente ke la Komunidad Djudia Franseza (ke es de leshos la mas grande i la mas aktiva de la Evropa) va luchar fuertemente afin de no deshar estableser kualkyer koza ke puedra prejudisyar la vida i la seguridad de los sitizanos Djudyos. Penso tambyen ke la Fransya ke es una grande nasyon bazada sovre la etika i la “igualdad de derechos” no deshara sin repuesta una semejante reklamasyon.
Martez 14/7. Sovre demanda de la Ministra de la Djustisya Michèle Alliot-Marie, el tribunal anunsyo ke un muevo procheso sera avyerto para analizar 14 kondenasyones pronunsyadas a un nivel inferyor a la demanda del Prokuror Jeneral.
