-

Grande aktividad artistika en el Anadolu Kulübü de Büyükada

 Segun lo ke mos konta anchamente muestra kerida kolavoradora Nelly Barokas,  varias ovras muzikales de kompozitores djudyos de la epoka imperyal Ottomana fueron prezentadas debasho la direksyon del Prof. Dr. Ruhi Ayangil, por su propyo orkestro i su koro.

La prestasyon fue briyante i izo bivir a la sistensya momentos de grande emosyon i de intensa reminisensya.

Aproksimativamente, 700 personas asistyeron a este ermozo konsyerto, entre las kualas: Marc Pierini Ambashador del Konsilyo Evropeo, Mordehai Amihai Konsolo Jeneral de Israel, Ami Bergman delegado de la  Joint en Turkia, Mustafa Farsakoğlu Prefekto de las Islas, Mevlut Kurban Kaymakam de las Islas,Faruk Tut Müftü de las Islas, Kıdemli Albay Metin Özel Heybeli Askeri Okul Komutanı.

Eran de mezmo prezentes: el Gran Rabino Rav Isak Haleva, el prezidente de muestra komunidad Silvyo Ovadya ansi ke numerozas personalidades de muestra sivdad i notables de muestra komunidad.

En su diskorso, Silvyo Ovadya disho “Estamos lavorando afin de azermos mijor konoser.

Fue segun la opinyon de todos los ke tuvyeron la oportunindad de asistir, una nochada eksepsyonal de retorno verso el pasado i de solidaridad presyoza kon los dirijentes prezentes.