La semana ultima fyestimos en la sinagoga de Burgaz; la venida de una Sefer-Tora mueva komo una novya.
Fue un dia inolvidavle i yeno de sentimyento.
!5 famiyas izyeron ganar a la sinagoga una sefer tora mueva, i para meterla a su lugar se realizo un dia espesyal.
Los dirijentes de este kal; kon la amor i la ardor ke tyenen, se konsakraron para azer una organizasyon maraviyoza por la “Ahnasat Sefer Tora”.
Se envito los dirijentes de muestra komunitad kon todos los ke keriyan asistir a esta fyesta.
Komo es una sinagoga chica, ermoza i kayente kon los asistyentes ke partisipan a las orasyones; uvo una djentorya, i para azer kaver i asentar a la djente, veramente los gabayes izyeron mas de lo ke pueden.
Era un dia; un tyempo muy kayente i yena de emosyon.
Todos egzaltados i yeno de entuzyasmo, tomaron la Sefer Tora i debasho la Hupa la kantaron komo una novya entre flores blankas.
El Grande Rabino Rav. İzak Haleva; tomo la Sefer Tora en sus brasos; i akompanyado de Shofares entro a la sinagoga.
Akel momento kaliya ver la ekspresyon de los partisipantes. Todos emosyonados, yorando i orasyonando. Despues ke la Sefer Tora se metyo enriva la Teva; El Gran Rabino, el Hazan Arashi Davit Sevi i el sofer Aron İdili kontrolaron i izyeron lo ke es menester. Las famiyas ke fueron la kavza de ser uno de los primeros (önayak olmak); ganaron una grande mitsva. Despues ke la kaminaron en el kal; kon kantes relijyozos, la Sefer Tora tomo su lugar en el Ehal.
Jojo Nasi el presidente de Neve Shalom; en su avla disho ke; la entrada de una Sefer Tora mueva, parese a una novya ke se va kazar.
El valorizo en dizyendo ke; El Grande Rabino Rav. Haleva, David Sivi i los gabayes Meir Gaon, Nesim Şalhon i Marko Levi kon sus devuamyentos, kon sus esforsos personales izyeron de esta sinagoga, una sinagoga espesyal.
Ke i mizmo el se esta konsiderando komo un yahid de Burgaz.
Despues, el dyo dos plaketas de remersimyento a los dos gabayes de antes vente anyos.
Lemi Hara, i Avram Albohayre.
Termino su avla en remersyando a los ke izyeron esta donasyon.
El presidente de la komunitad Silvyo Ovadya; remersyo las famiyas por este dono muy sinyifikativo i emportante.
Rav. İzak Haleva disho ke; de las sefer-toras prezentes, las mas muevas son de 150 anyos. En una orasyon de Shabat, sintyeron la nesesitad, el menester de una mueva sefer tora i desidaron de merkarla.
Komo moramos en enverano en la isla Burgaz; mos estamos glorifikando de este evenemento ke fue alhad ultimo.
Realizar esta fyesta i asistir a este evenemento, es una ves en la vida. Lo ke bivimos aya era komo una inondasyon de sentimyento (duygu seli).
Los djudyos tenemos munchas tradisyones en todo modo de sujeto. Las tradisyones i las nesesitades relijyozas son emportantes.
Keridos lektores; ke este evenemento tenga kontinuasyon komo las luzes de la Hanukiya ke kemamos durante ocho dias.
La primera kandela mos aze akodrar la Luz,
La sigunda kandela mos aze akodrar la Tora, la tresera es la djustisya (adalet), la kuatrena la piadad, la sinkena la santedad (kutsallık), la sejena la kerensya, la syetena la pasensya i la ochena es la Luz del koraje (cesaret).
Esto rogando ke syempre los djudyos del mundo entero; seygamos protejados por el Patron del Mundo.
