Komo syempre dospuez de una kurta primavera ya empesaron las kalores . Kada anyo lo mizmo;komo las kazas son serradas por dies mezes se topa munchas kozas de enderechar. El uti ke korye, el shofben ke no kaynta, la makina de lavar ke kere adovar. Tan kozas para penar ke los primeros diyas pensamos par kualo vinir a la Ada? Para penar. El buri de la entradura de la kaza se avriyo i las auas empesaron a koryer. Encuntos kon el inyeto de kaji 4 anyos mos huimos a topar un “usta” i lo enderecho. A la tadre este evenimyento se konto a los paryentes. Las madres en el echo i los inyetos kon las grandmamas. Achakes de mi inyeto tuve la okaziyon de konoser i konversar kon muncha gente. En kaminando por las kalejas me enkanti por sus remrakas. Mira me disho un arvole de ananas! En amostrandome un palmiye. Syempre tyene kestyones de lo ke se pasa al entorno. En las kalejas ay unos kuantos chikos de pasharos ke no pueden daynda bolar. Le ekspliki ke se vana ambezar i a la fin de enverano vana bolar. Esta mirikiyozo de saver kualo azen los padres de los pasharos. Estan asperando enriva de los techos le respondi. No le plazyo i de si para si disho” los padres se van al echo”. Las ijikas de su edead ya tyenen otros pensamyentos; una amiga de su klasa disho ke no dyo daynda karar kon ken se va kazar.
Por doz semanas Arel se esta indo a una eskola de enverano. Kada demanya sale de kaza kon antojos i cuetes en la mano. Lo devo konvenser a deshar los juetes ke los puede peryer o olvidar. Dospuez de desharlo a la eskola tengo un sako de juetes allado. Un diya tadri de kinze puntos para tormarlo de la eskola. En el kamino me disho” yo no yori pormodo ke tadrates, yo no yoro”. De aya entendi ke le izo pena de asperar. Dospuez de la komida de vyernes la noche justo ke me estava aparejando a arekojer la meza me vino una propozisyon de Arel: “Ven jugaremos aryento!”. Este anyo moz izimos amigos grandes.
