Esta semana, frankamente no estava topando kualo eskrivir. Tuve echos ke me kansaron i un poko konfuza, devo atorgar ke teniya el meoyo vaziyo. El diya de la aparisyon del jurnal es el 15 de Av o Tu Be Av si preferash. Komo ya eskrivi bastante la otra semana sovre este diya oy no kije repetarme. Alora, dishe tomare konje de mi editora!!.. Ma no uvo menester. Komo lo digo syempre, el azardo vino otruna vez a vijitarme (o ayudarme!). Puede ser lo ke va azer es una manera de oportunismo. Los lektores van a desidar si es ansi o no... O puede ser es un sinyo de “deformasyon profesyonal” komo lo esta dizyendo Gila Benmayor en su teksto del “alom” del primo Julio.
A la verdad keridos amigos, es este mizmo No. de muestra gazeta ke fue el esensyal manadero miyo. Ay entre sus pajinas dos, tres koensidensas, komo ke diga?... Me enkantaron i las asimili un poko kon mi propyo.
Ampesaramos djustamente kon la Sra. Benmayor. Eya en kada viyaje ke aze a un pais, ve las kozas i la djente kon el instinkto (içgüdü) de kitar un artikolo. Ansi azyendo, no puede parvenir a profitar ni de la ermozura de akel momento, ni del derredor. El faktor ke la rende diferente de los otros viyajadores deve ser, asigun eya, la “deformasyon profesyonal”. Keridos amigos, Gila Benmayor es una pura profesyonala. Meldo sus tekstos. Absolutamente no kero kompararme a eya. Ma, es una realidad ke i yo ago lo mizmo munchas vezes.
Yo me influenso muy frekuente de lo ke veygo, meldo o syento. Alora, kualo de mas natural de transferar estos sentimientos, estas impresyones o informasyones a una oja, egzaktamente komo esto azyendo en este momento? Kontinuando, kon el kanton de muestra amiga Ester Yannier. Ay una koza muy sinyifikante (anlamlı) ke kero tresladar... “El kazal entero sale a la orasyon de luvya. Ma, solo uno tiene una ombrela (emsiye). Esto es “Kreensa”.... “El padre va echando su bebe al aver, lo va saltando. La kriatura, kontente esta echando tarakas (kahkaha), sin espanto de kayerse. Esto es “Konfiensa”... El benadam se echa a la kama sin dinguna garansiya de amaneser sano i rezyo. Portanto, antes de durmir aze planos para el diya ke va vinir. Esto es “Esperansa”... Kon estos tres, la vida es ermoza. Si, keridos amigos, la vida es ermoza i yo syempre tuve kreensa, konfiensa i esperansa en eya. Este paragrafo merese de ser meditado...
En la 8ena pajina el teksto sinyado Nazlı Doenyas trata de la İndia. Un pais Asiatiko, teniendo una populasyon djudia depasando 6.000, en mayoriya instalados en Mumbai (Bombay). Bivyeron syempre en paz asta el Novembre 2008. Tenemos muy fresko en las memorias los atakos terroristos i la desgrasya del Sentro Djudio... En la oja enfrente esta el teksto miyo sovre los “Djudios de la China en la Historia”. Ke koensidensa keridos amigos, de aver eskojido yo i la Sra. Doenyas komo sujeto estos dos paises djigantes de la Asia. En un lugar de mi artikolo, en avlando de la Kultura Djudia, esto mensyonando i yo la İndia, la famiya Sasoon ke desho munchas ovras en los dos paises...
Reushi azer este teksto grasyas a las damas ke nombri i ke fueron mis “fadas de inspirasyon” (ilham perisi). Es koraje o oportunismo?.. Vo terminar kon las palavras de Violet Alaluf (p-5) “ Eskojed un buto. Es ke reelmente lo keresh alkansar? Ke obstakolos tenesh delantre? La sola koza de azer es echar los pasos menesterozos. La vida ama los korajozos!...”
Semanada buena a todos los lektores...
