Estas semanas (en medyo de Julyo, 2009) en la Amerika kada dia en la televizion estamos viendo las enterogasiones de parte de los miembros del Senato (Senate) a la djuzgadora (hakim) Sonia Sotomayor, ke fue nominada por el Prezidente Obama a ser miembra del “Tribunal Supremo” (Supreme Court). Puede ser ke asta ke meldash esto, ya va ser afirmada komo la mas mueva miembra i la primera “Latina” en esta alta pozision.
Los “Latinos”, ke a vezes se yaman tambien Hispanics, son sivdadinos Amerikanos kon raises familial en la Amerika Latina i en la lengua espanyola, i konstituen una de las mas grandes “minoridades” (minorities) en los Estados Unidos. Siendo ke i los Judyos tambien somos una minoridad aki, komo en todos los paises aparte de Israel, mos enteresamos i apresiamos esta nominasion de Sotomayor .
Asta agora uvo 7 djuzgadores Judyos en el Supreme Court Amerikano; los dos estan dainda aya (Stephen Bryer i Ruth Bader Ginsberg, nomindados por el Prezidente Clinton.)
El primer Juzgador Judyo elejido al Supreme Court era Louis Brandeis, ke fue uno de los mas famozos i mas admirados Juzgadores en la istorya Amerikana. El sirvyo de 1916 asta 1939 (muryo en 1941.) Brandeis era un buen Judyo i un grande Sionisto, i en sus famozas konferensias el ekspliko ke no ay dingun konflikto entre ser Judyo o Sionisto, i ser un Amerikano patrioto. A la kontra, disho el en una konferensia famoza del 4 Julio 1915 (aniversaryo de independensya Amerikana), ke para ser buenos sivdadinos Amerikanos, devemos ser buenos Judyos.
Esto Brandeis lo apliko tambien a todas las minoridades, diziendo ke deven de mantener sus kulturas, i ke el pais sera mas fuerte en dando libertad a todas las minoridades para mantener sus tradisiones. Ansi se establesyo la idea de “multikulturalismo” en la Amerika, i empeso su praktika. Oy en dia verash ke los Judyos Amerikanos, aun ke tienen grandes diferensias entre eyos en el grado de observansia relijioza (formando varias kehilot de reformistas asta ultra-ortodoksas), jeneralmente tienen una identidad fuerte de ser Judyos i Amerikanos patriotos en mezmo tiempo. Lo mezmo se puede dizir de los Latinos, los pretos (blacks, negroes, ma agora se prefera African-Americans), los muslumanos, i munchos otros sivdadinos Amerikanos de diversas kulturas, ke biven aki kon todos los derechos de individuos i de libertad de mantener sus linguas i kulturas. Kreygo ke esto se izo tambien el modelo de multikulturalismo para munchos otros paises.
Mozotros komo Judyos Sefaradis tenemos orgulyo de saver ke el sigundo djuzgador Judyo ke sirvyo en el Supreme Court , de 1932 asta 1938, fue un Sefaradi, Benjamin Nathan Cardozo. Sus avuelos avian venido a la Amerika de Inglitiera, ande se avian enstalado despues de la salidura de Espanya i Portugal. El era primo de la muy famoza poeta Sefaradi, Emma Lazarus, ke eskrvyo las linyas poetikas en la Statua de Libertad (Statue of Liberty) en New York. Eyos (ni los Sefaradim en jeneral) no son konsiderados Hispanos, aun ke sus raises eran en Espanya, porke esta designasion es solo para los ke vinyeron de paises de la Amerika Latina. Si no, Sotamayor iva ser konsiderada la sigunda Hispanic en el Supreme court, i Cardozo el primero!
