-

Syeten aniversaryo de la muerte de Rav David Asseo

Fue en una atmosfera yena de emosyon i tambyen de grande respekto, ke fue dicho el Kadish por la alma del defundo Gran Rabbino de Turkiya “Rav David Asseo”, en prezensya de sus dos ijas Sara Mizrahi  i Fortune Asseo, de sus dos inyetos, ansi  ke del  grande Rabbino aktual Rav İsak Haleva, ombre el mizmo de grande komprensyon humana.

La asistensya era nombroza, kompuesta de los myembros del Bet - Din i de relijyozos Ashkenazim, del Prezidente de muestra komunidad Silvyo Ovadya, del Prezidente del Neve Şalom Vakfı Jojo Nassi i del de la FKD, Seyfi İşman, ansi ke de los dirijentes i myembros de varias ovras i asosyasyones karitativas i de nombrozos notables i damas de muestra kolektividad.

A un  syerto momento Rav Yeuda Adoni, ombre de profunda maturita i buendad,  tomo la palavra i mos komuniko syertas palavras de muestro defundo Shefe Ispiritual...refleksyones yenas de sagasidad ke esmovyeron profundamente la asistensya.

Ke su alma repoze en paz.

Triste...muy triste

 Las Prensas eskritas i elektronikas Amerikana, Evropea, Turka i Israelyana relataron el arresto de un grupo de malazedores ke se okupavan, en los Estados Unidos, de enganyo fiskal, emblakesimyento de moneda frodulozamente ganada i de trafiko de organos humanos. Entre eyos kuatro o sinko relijyozos djudyos, el uno kon el Taled sovre los ombros.

 De sus parte  es mas ke un simple delito, es un abuzo de konfiansa. I esto es una kulpa muy muy grave.