Antes dos semanas un grupo de kuarenta esportivos (sporcu), kon vente dirijentes se fueron a İsrael por kinze dias, a los Maccabiates.
La seremonia de avyertura (açılış töreni) del diziochen djugo de Maccabiate; fue el 12.7.2009 dia de alhad.
En la seremonia ke se realizo en el stadyum de Ramat- Gan; partisiparon 9.000 esportivos kon 30.000 espektadores, todos djudyos del mundo entero.
La trupa (kafile) amerikana partisipo kon 1.000 personas. El grupo turko partisipo en las seksyones de basket-ball, tennis i futsal.
Maccabiat es el olimpiyat ke arrekoje a todos los esportivos djudyos del mundo entero.
En la seremonia; despues del presidente del estado Şimon Peres ke entro al stadyum kon sus guadrias (koruma); todos los grupos de 50 paises entraron kon rango i kon palmas (alkış) al stad.
Despues de las avlas de Şimon Peres i Binyamin Netanyahu, la seremonia kontinuo kon los bayles İsraelyanos, i un konser.
La Turkiya partisipo kon dos grupos de futsal a estos djugos.
Futsal es; el football ke se djuga en un salon serrado.
El primer grupo de los mansevos de 15-16 anyos.
El sigundo grupo de los mansevos de 17-18 anyos.
Los chikos era la primera ves ke partisiparon a esta organizasyon. Malgrado ke era la primera ves; eyos izyeron mas de lo ke puedyeron.
El antrenor del grupo grande fue mi ijo İlker Gaon kon el amigo Rıfat Karaköy. Ay dos anyos ke estan penando i lavorando para ambezarles la manera de djugar bueno;dos vezes a la semana, de dia i de noche para pueder reushir i ganar una medalya.
Los dos antrenores kon el dirijente Vedat Levi; i la ekipa de los mansevos; se ataron unos kon los otros, de aryento del korason.
Esta ekipa aviya partisipado antes dos anyos a los Maccabiates en Roma. Eyos tuvyeron una eksperyensa i la amor del djugo, la armonia kon la ambisyon de la reushitad, les izo ganar la medalya de Bronzo.
El enkontro kon los grupos de Brasil i Argentina no fue reushido. Ma, a la fin eyos ganaron, i es por la primera ves en esta seksyon ke tomaron una medalya.
Fue, un grande orgolyo para eyos i para los dirijentes de esta organizasyon.
Partajar munchos rekuerdos (anı) kon diferentes esportivos del mundo entero, la kerensya i los trokos (değiş tokuş) entre eyos de las vistimyentas appropriadas a sus paises, los izo aserkar unos kon los otros.
Esto es; una forma de amigable, de amistad ke se kreye entre eyos.
Es una grande eksperyensa para estos mansevos de asistir a estas kompetisyones (yarış) ke partisipan los paises del mundo entero.
Aki; kale dar emportansa al apoyo (destek), ke da esta organizayon de Maccabiat de Estambol.
Kale remersyar a los dirijentes ke estan puedyendo azer kontinuar kon grande ahadu, la partisipasyon de los esportivos, malgrado esta situasyon ekonomika ke toko a todos.
Viniremos al enkontro en el aeroporto de Yeşilköy. Era veramente koza de ver!... la yegada (varış) a Estambol.
Las madres i los padres asperandolos demanyana temprano; i ya abasho el avion, i estamos vyendo ke ya empesaron a salir.
El grupo de futsal kon las medalyas enkolgando kon orgolyo, kada uno i uno, las bozes tomadas de gritar tanto; i los antrenores endjuntos kaminando kansados, ampesimos a aplodisar (alkışlamak), i las madres yorando de guste i travando fotografias.
Estava una aparisyon (görüntü)muy sentimental.
Todos bezandosen unos kon los otros, los paryentes felisitandolos a eyos kon los dirijentes, mos espartimos kon grande alegriya.
Esto remersyando a los dirijentes de la organizasyon; i en esperando ke se puedan iyir syempre a estas kompetisyones i ke tornen kon reushitades i guste, para aunar las mansevas i a los mansevos djudyos, para atarlos fraternalmente (kardeşçe).
