En el eskopo de luchar kontra el neo-nazizmo, el prezidente del Konsilyo sentral de los Djudyos de Almanya se pronunsyo en favor de una mueva reedisyon del livro-manifesto hitleryano “Mein Kampf” el kual yevara las fuertes kritikas historikas echas por grandes universitaryos al sujeto de las terrivles teorias desvelopadas en este maldicho uvraje.
***
Alhad el 9 del mez koryente, el otomobil del Governador de Yerushalayim Nir Barkat fue atakado por un grupo de relijyozos en sinyo de protestasyon kontra la desizyon de avrir un parking en dia de Shabat. En repuesta, el Governador deklaro klaramente ke no va renunsyar ni abokar kavesa delantre la violensa.
***
A penas reelijido prezidente del Fatah, Mahmud Abbas prometyo de liberar la tyerra de Palestina ansi ke su puevlo de la okupasyon Israelyana. El disho :Deklaro a todos kel Fatah yeva en su programa un Proyeto Nasyonal i una vizyon klara de un Estado Palestinyano.
***
Segun Avigdor Lieberman la paz kon los Palestinyanos es poko probavle; sus pozisyones radikales i intransijentes sovre Yerushalayim, la egzijensya del derecho de retorno de los refujyados, ets...ets...krean un grande handikap”.
El presizo ke la politika Israelyana deve bazarse sovre una realidad i no una iluzyon, todo en mantenyendo el dialogo kon los Palestinyanos i amelyorando los akordos de seguridad i la situasyon ekonomika de la Palestina.
