Muestro konosimyento reel data muncho mas de medyo Siglo, 1951-52... Emili i yo kazimos una detras d’otra i morimos en el mizmo etaj del famozo Saffet Bey Apt. en Galata. Myentres ke eya biviya kon su esfuegra, yo estava “Meza Franka” ande mis djenitores. Syendo de la mizma edad, naturalmente tuvimos una relasyon amikal ma no muy larga akeya epoka. Tuvimos famiya, trokimos de moradas, espartyendomos de la kaza de los padres. Portanto no mos peryimos de vista porke teniyamos serkanos komun. İ agora, desde 27 anyos semos mas ke amigas. Mos enkontramos muy frekuente, en todo modo de fyestas i okazyones. Agora semos kosfuegras!...
Bueno, basta komo introduksyon!.. Konoseremos un poko Emili la “artista”. Nasyo en Kırklareli (Kirkisya) ande izo sus primeros estudyos. En los mizmos anyos meldimos en el Kolejio St. Benoit, en klasas diferentes de sorte ke no tuvimos un reel amigavle, si puedo dizir ansi. Ni durante muestro vezindado ni mas despues tuve un indisyo de su talento. Era un “hobby”? Komo, kuando ampeso?
Su “instruksyon ofisyel” komo dize eya, su “aprendisaje” de pintura ampeso el 1987, kon los kursos en el “Muzeo de Skulptura” de Beşiktaş. Kontinuo en el atelye de la Sra. Nuran Keskin, ambezandose la teknika de “pastel”...1990, primera inogurasyon de sus ovras myentres la ekspzisyon en la Galeriya d’Arte “Gözlem” (Şalom), en Mola Apt.Nişantaş. Tambien mi primer “kontakto” kon su talento. Un syerto tyempo se inisyo a las teknikas de pintura en los atelyes del Sr. Mahir Güven i la maestra Gonca Sezer.
Djuntos kon una amiga del grupo, formaron un atelye ande ampesaron a lavorar kon diversos profesores de pintura, entre otros el Sr. Selim Karadana. En esta epoka partisipo a dos ekspozisyones mikstas, en la Galeriya d’Arte del Muzeo Maritim de Beşiktaş. Anyos 1998 i 2000... Kontinuo kon el Prof. Kerim Kılıçaslan de la Universidad Marmara i del Prof. Burhan Özer, ambezandose diversas teknikas. En 2004, en el “Sentro Kultural de la Munisipalidad de Beşiktaş” (Ortaköy) admirimos sus ovras en una mueva ekspozisyon miksta. Kon tyempo, kontinuo a lavorar en kaza.
La mas memoravle ekspozisyon fue la del anyo 2007. Una ekspozisyon retrospektiva individual en “Cream Art Gallery” de Kuruçeşme. Era en realidad un “surprise-party” organizado por los ijos i inyetos a la okazyon del aniversaryo de Emili. Eya no estuvo al koryente de los aparejos de su famiya asta el punto ke entro a la Galeriya. Paryentes, amigos, konosidos, tuvimos la oportunidad de kontemplar kaji la totalidad de sus ovras... Arrekojidas una a una, naturalmente en emprestimo, de los lugares ande se topavan.
En desparte de la pintura, Emili entre los anyos 1998-2005 lavoro sovre la seramika en el atelye de Sara Aji. Tambien se okupa de mozaika desde un syerto tyempo. Emili Şayir ultimamente partisipo al Proyekto “La Tora İlustrada” kon un tablo de 50x70 c.m komentando la Perasha “Vayishlah” (Bereshit 32:4-36:43). Lo sueto de korason i espero ke Emili va kontinuar a darmos i otros eshantiyones de su talento artistiko.
