Shabat ultimo fue un dia yena de emosyon i sentimental, en la Sinagoga de Burgaz.
Los dirijentes de esta sinagoga aviyan desidado de yamar a todos los mansevos de 13-15 anyos, ke izyeron sus bar-mitsvas; a la Sefer-Tora, para darles este gusto i uzo de vinir los shabates a la keila.
Munchos dentre eyos; aviyan fyestado solo el tefillin.
Todos vistidos limpyos, kon sus madres, padres, granmamas i granpapas, ermanas i ermanos, entornados de kerensya de sus famiyas, vinyeron a la keila de Burgaz, shabat demanyana.
El tablo de kerensya i amistad de kuatro jenerasyones, era koza de ver.
Todos kon las karas riyentes i kontentes de asistir a esta orasyon. Kuando todos los mansevos, fueron yamados unos por unos, kaliya ver la ekspresyon (ifade) de las madres i el orgolyo de sus padres en oyendolos orasyonar.
Despues, kada uno fue a bezar la mano del Gran Rabino, kon sus padres i madres.
A la fin de los kantes i orasyones, una seuda perfekta i abondante preparada por Barınyurt Catering; arekojyo a todos en el doredor de una meza muchedumbre (kalabalık).
Savoreyando las borekitas de berendjena, kon los dulses, el dia se termino en avlando, burlando i riyendo.
Los paryentes de los mansevos estuvyeron mas de kontentes i remersyaron a los dirijentes ke organizaron este dia.
La sigunda emosyon esta semana, es el albon de los paryentes ke estan embiyando sus ijos a azer el servisyo militar.
Munchos mansevos de muestra komunitad se estan iyindo a diferentes lugares para azer sus doveres de kompatrioto (vatandaş).
El servisyo militar; es una obligasyon por los mansevos de 20 anyos por ariva.
Ay munchas kategorias de azer este servisyo, komo sej mezes, un anyo u anyo i medyo.
Komo i mi ijo se va iyir al servisyo al 12.8 kon todos; sus amigos le izyeron un parti para embiyarlo kon alegriya. Shabat despues de midi, 200 mansevos todos endjuntos vinyeron al klup de Burgaz i organizaron un dia maraviyozo.
Kaliya ver la emosyon de todos komo si fuera ke se estan iyindo i eyos. Eyos bivyeron los evenementos endjuntos i no lo desharon solo, ni un punto.
Kuando ya se ambezaron la sivdad ande se va iyir; un amigo ya le aparto lugar en el avion, el otro ampeso a azer bushkidades (araştırmak); si el lugar ke se va iyir si es bueno i repozado, sin perikolo (tehlike).
Komo de amigable!...
Esto es el sinyo de la amistad (arkadaşlık, dostluk).
Los ke estan bushkando kon telefon, amigos muestros, de mi ija, i el entorno de mi ijo para ogurarle, una perioda fasil, los ke estan vinyendo a kaza para vijitarmos, veramente esta emosyonando a la persona i alegrando de ver ke lo keren tanto byen.
El Dyo ke los proteje (korumak), de todos los males a todos los mansevos, i kaminos de leche i miel.
Ke vaygan i ke tornen kon sanedad.
Fuersa i pasensya a los paryentes, i tomaremos syempre
novedades (haber) buenas de muestros ijos.
