Desde unos kuantos dias el mundo oksidental esta aryento interminavles kontroversyas konsernando dos kavzos ke munchos analistos konsideran komo umilyantes para dos payizes evropeos i negativos enverso los Estados Unidos.
El primer kavzo es la demanda de ekskuza adresada a Moammar Khadafi, de la parte del prezidente de la Suisa, por la kondenasyon de uno de sus ijos ke avia ordenado (en este mizmo payis) de inflijir a uno de sus servitores la umilyasyon de resivir haftona por una kualkyera kulpa, lo ke es absolutamente kontraryo al kodigo penal Suiso i prohibido por la Deklarasyon de los Derechos del Ombre.
La kontestasyon del puevlo Suiso ke se sintyo arrebashado en su dinyidad fue muy fuerte, la sentensya de un tribunal por un akto perpetrado sovre la tyerra del puevlo ke el reprezenta, deve ser syempre aplikada si eya es adekuada a las leyes del payis, kualas seyan las tradisyones del orijen del kulpavle.
El segundo kavzo es la liberasyon de Abdilbaset Ali Mohamed Al-Meghrabi uniko kondenado del grupo ke aparejo el asalto terroristo libyano en 1998 kontra un avion Amerikano ke eksplozyo sovre la sivdad Ekosesa Lockerbie, atentado ke okazyono la muerte de 270 inosentes por la mas parte mansevikas i mansevikos amerikanos,
Asentesyado en 2001 a ser enkarselado a vida, Meghrabi vyene de ser liberado por kavza de un kanser en la prostat, aktualmente en su faze final....
En rendyendole la libertad el djuzgo Ekosezo espesifyo ofisyalmente ke es por razon de klemensya humanitarya.
Pokos fueron los ke se desharon konveser por este argumento i son nombrozos los ke afirman ke la sola razon es de natura ekonomika afin de asegurar a la İngleterra su aprovizyonamyento en petrol i gaz Libyano...
Moammar Khadafi resivyo Meghrabi vyernes la noche komo un eroe, lo felisito i en mezmo tyempo saludo el koraje i la independensya de la Ekosya. Su ijo Seif Al-Aslam deklaro de su parte ke “en todos los kontratos komersyales de petrolyo i gaz kon la İngelterra el nombre “Meghrabi” se topava en los dosyes de negosyasyon.
Otras rumores avlan, eyas, de una probable reklamasyon de la parte de Al-Meghrabi (el kual pretende ser la viktima de una error djudisyal) de revizar el procheso, lo ke puedra provar su inosensya; reklamasyon moralmente muy akseptavle a la kuala el acheto de renunsyar en kavzo de liberasyon immedyata...
Asta ke grado estos ruidos son verdaderos o falsos? Eske un kualkyer yerro fue echo en el primer djuzgamyento del anyo 2001? Entonses seria noble de reabilitar un inosente kondenado sin razon... Ma, en kavzo de simples motivos ekonomikos, las konsekuensas puedran ser muy graves... “Deshar sin kastigo una kulpa ke provoko la muerte de 270 personas” es avrir la puerta a otros aktos similaryos.
Una sentensya judisyal no es un akto de vengansa, ma un ovligo de obedyensa a la Ley i sovre todo de respekto enverso la “kriansa umana” kuala ke sea ke fue matada o ferida... El djuzgo Ekoseso avlo de humanizmo en liberando Meghrabi... Segun lo ke meldimos en la prensa, el kondenado no fue nunka maltretado, el se topava en un hospital ande resivia los kudyos menesterozos i su mujer komo sus ijos tenian la libertad de ir a verlo...
Kuala ke sea la realidad, los agradesimyentos del governo Libyano a los dirijentes İnglezes no realsaron sus prestijyo... Es desgradante de
maskar la verdad debasho palavras pompozas ke no enganyaran ninguno...
