El diya Evropeo de la Kultura Judiya, se va selebrar en munchos paizes de la Evropa, el sesh del mez Septembre 2009. El objekto de este diya es, de organizar aktivitades sovre la kultura judiya al publiko, por ke deskuvran muestra erensya kultural i historika. Los eventos aparejados por este diya, vana tomar lugar en Galata. Komo lo savesh, Galata era la mas emportante zona rezidantal de la komunidad judiya de Estanbol, en el dizimuevien siglo i en el empesijo del ventiem siglo. El tema de este anyo es ‘Fiestas i Tradisyones Judiyas’. En muestro pais, las aktividades se vana organizar en la Sinagoga Neve Shalom, la Sinagoga İtalyana, la Sinagoga Ashkenazi, el Muzeo de 500. Anyo de la Fondasion, la Eskola Austriana, i la Asosiasyon de Galata. Estos sentros vana ser aviertos a todos los vizitores, diya entero. Egzebisiones, konsertos, paneles, konferansas, i ekskursiones vana ser organizadas en estos sentros. Los enterlokutores aparejaron paneles i lekturas sovre diferentes sujetos; las viejas zonas judiyas de Estanbol, el arte de bivir endjuntos, i la Presa Judiya en el Emperio Ottomano. Egzebisiones sovre skultura, pintura, imprento, i objektos judiyos vana ser ilustradas en diferentes lugares. El Koro Maftirim, el Koro de la Komunidad Judiya de Selonika, un projekto de las melodiyas Ashkenazi- Sefaradi, seleksiones de los kompozitores judiyos, imnos de la Sinagoga Sefaradi, melodiyas sefaradis del grupo los Pasharos Sefaradis, un projekto de la Perkusion Brezilyana, i el Kuarteto Tahsin Unuvar, mos vana dar konsertos segun el programa aparejado. Ekskursiones vana ser tambien organizadas por Festur, a las Sinagogas situadas en las viejas zonas judiyas de Estanbol. Este anyo, el Diya de la Kultura Judiya kayo en los mizmos diyas de Ramazan. Por esta okazion, una fiesta de la komida de İftar va ser selebrada endjuntos, komo un sembolo de la unidad entre las kulturas. Todos los ke keren partisipar son envitados a esta komida. El mas emportante evento del diya, va ser la seremoniya de la Brit Milla sembolika, ke va ser organizada en la Munisipalidad de Beyoglu, a la fin del diya. El objekto de este diya es, de entrodusir (tanitmak) muestra kultura a la grande sosietad del pais. Konoser la kultura, la tradision, i la vida de las komunidades ke biven endjuntos ayuda, a konoser al ‘otro’, i de esta manera, enfuertese la komunikasion entre las kulturas del pais. Yo me esto kreyendo ke, konoser la kultura del ’otro’, kon tiempo, va reushir a derrokar las paredes entre las komunidades, enfuerteser la amor, la komunikasion, i la pas, entre los diferentes puevlos ke biven en endjuntos
