Un pensador, si no me yerro de la primera mitad del Venten siglo, avia formulado aproksimativamente esta kestyon: “Aken apartyene un ninyo?
A la mujer ke lo mete al mundo? O, a la ke lo engrandese?
La semana pasada tuve la okazyon de segir en el posto LCP de la Televizyon Franseza un debate muy interesante entre 4 ombres de syensya, sovre un sujeto ainda malorozamente tratado raramente: “El problema de las mujeres ke emprestan sus utero (matris) para resivir artifisyalmente el spermo de un ombre anonimo del kual la kompanyera no tyene la posibilidad de yevar en sus entranyas el fruto de sus unyon”.
Los Fransezes las yaman “les mères porteuses” (las madres portadoras)... Salvo las interdiksyones relijyozas, el problema fue analizado de su punto de vista psishiko, fizyolojiko, juridiko i mizmo sosyo-filozofiko.
Una emisyon ke (lo penso) desharia los ke la sigyeron pensativles i mizmo puede ser perpleksos... Ansi, un largo minuto me demandi de mi para mi: “ke puedra ser (al momente de despartirse definitivamente del ninyo al kual eya dyo artifisyalmente vida) la reaksyon de una mujer ke yevo en sus entranyas, durante 9 mezes, un kresido i lo sentyo menear en su tripa?... un kresido al kual voluntaryamente o involuntaryamente eya transmetyo syertas kozas no solo de su kodigo jenetiko ma tambyen de sus emosyones. No es solo el spermo del ombre ke kumple el milagro de krear una kriansa umana ma tambyen este potensyal afektivo ke la madre le transmete durante el largo periodo de la jestasyon.
Deve, por seguro, aver razones imperyozas para ke una mujer aksepte de “alkilar” ansi su tripa a un ajeno: “imperativos ekonomikos”, “mizerya”, “imposibilidad de topar un kualkyer lavoro por falta de kualiflkasyon sufizyente“, “urjensya de asumir o partisipar al mantenimyento de sus propyos ijos”, ets... ets...
Si, ke puedra ser el sentimyento de esta mujer, al momento de su separasyon del “rezin nasido” ke no le apartyene ni legalmente, ni moralmente, ma ke eya sintyo palpitar en la intimidad de su ser?... Indiferensya? No kreo... Remorso? fue una traktasyon aflijente ma kumplida en una total onestedad si no legalidad?... puede ser simplemente komo un estranyo arranko de korason, la sensasyon de pedrer por syempre un poko de si mizmo.
Asta ke grado, mizmo si se trata de una simple negosyasyon, eya puedra kedar indiferente ? Una filozofa amerikana avia desvelopado en el kampo sosyo/filozofiko una teoria nombrada “la vertud de indiferensya”, un djenero de rasyonalizmo kaji sovrehumano o puedeser inhumano. Es ke esta teoria puadra ser aplikada en el kampo afektivo?
I el fruto de esta realizasyon? kuando sera un adolesente de 14/15 anyos al kual los paryentes devran konfesar la verdad, ke sera su reaksyon ? Asta ke grado el puedra salir idemne de este dualizmo maternal?...eske no kerera saver en ke ambiyente fizyolojiko prenatal el se formo?.
No ay dubyo ke la syensya dyo al ombre la posibilidad de kumplir adelantamyentos ekstraordinaryos, los kualos sovrepasan las simples posibilidades humanas, ma es ke eya puedra syempre rezolver las situasyones envezes dramatikas (raras es verdad) ke estas realizasyones puedran krear?
